بيىل قازاق رۋحانياتىنىڭ ماڭىزدى باسىلىمى «انا ءتىلى» اپتالىعىنىڭ جارىق كورگەنىنە 35 جىل تولدى. 1990 جىلدىڭ 22 ناۋرىزىندا الماتىدا العاشقى سانى شىققان بۇل باسىلىم ۇلتتىق ءتىل مەن مادەنيەتتىڭ ناسيحاتشىسى بولىپ كەلەدى.
«انا ءتىلى» – قازاق ءتىلىنىڭ مارتەبەسىن كوتەرۋ، ونىڭ قولدانىس اياسىن كەڭەيتۋ، ۇلتتىق قۇندىلىقتاردى دارىپتەۋ جولىندا ايرىقشا ەڭبەك ەتىپ كەلە جاتقان باسىلىم. گازەت قازاق ءتىلى حالىقارالىق قوعامىنىڭ جانە رەداكتسيا ۇجىمىنىڭ باستاماسىمەن قۇرىلىپ، ەلدەگى ءتىل ساياساتىنىڭ وزەكتى ماسەلەلەرىن كوتەرىپ كەلەدى.
گازەت اپتالىق فورماتتا شىعادى.
گازەتتىڭ العاشقى باس رەداكتورى – جارىلقاپ بەيسەمبايۇلى، ال قازىرگى ۋاقىتتا بۇل جاۋاپتى قىزمەتتى ەرلان ءجۇنىس اتقارادى. بۇگىندە «انا ءتىلى» گازەتى «قازاق گازەتتەرى» جشس-ىنە قاراستى باسىلىمداردىڭ ءبىرى.
«انا ءتىلى» گازەتى 35 جىل بويى مەملەكەتتىك ءتىلدىڭ قولدانۋ اياسىن كەڭەيتۋگە، قازاق قوعامىنداعى ماڭىزدى ماسەلەلەردى كوتەرۋگە ۇلەس قوسىپ كەلەدى. باسىلىم بەتىندە ءتىل جاناشىرلارى، ادەبيەتشىلەر، تاريحشىلار، ساياساتكەرلەر قازاق ءتىلى توڭىرەگىندەگى كوكەيكەستى ويلارىن ورتاعا سالىپ، ۇلتتىق مۇددە جولىندا پىكىر ءبىلدىرىپ كەلەدى.
