Aqtaý qalasynyń turǵyndary Qazaqtyń ulttyq kıimin kıgen adamdardyń bir jerde eń kóp shoǵyrlanýy nomınaııasynda Gınnes rekordyn jańartty, dep habarlaıdy "Adyrna" ulttyq portaly.
Kaspıı teńiziniń jaǵalaýyndaǵy arnaıy alańǵa bes myńnan astam adam jınalyp, qazaqtyń ulttyq kıimin álemge pash etti. Aýa-raıynyń salqyndyǵy men jańbyrǵa qaramastan, halyqtyń merekelik kóńil-kúıi joǵary boldy.
Rekordty resmı tirkeý úshin Londonnan Gınnes rekordtar kitabynyń shtab-páterinen arnaıy ókil kelip, jınalǵan jurtshylyqty Naýryz merekesimen quttyqtap, rekord ornatylǵany týraly sertıfıkatty saltanatty túrde tapsyrdy.
Ánshi Tamara Asar ınstagram jelisinde oqyrmandarynan súıinshi surady.
"Aǵaıyn!!! Rekord ornatyldy!!!
Búgin 22 naýryz kúni Aqtaý qalasynda Ulystyń Uly kúni,elimizdiń mádenıetin dáripteıtin Ulttyq kıim boıynsha Álemdik Gınnes rekordyn ornatyldy!!!
“Best fest Nauryz” sharasyna 5500 adam tirkeldi", - dep jazdy ol.
Qatysýshylar alańǵa tańǵy saǵat 9-dan bastap jınala bastady. Saǵat 11:00-de uıymdastyrýshylar 4 myń adamnyń kelgenin, al 12:01-de qatysýshylar sany 5 myńnan asqanyn jarııalady. Osy kezde alań ústinen dron ushyrylyp, naqty derekter ekranda kórsetildi.
Sertıfıkat tabystalǵan soń, merekelik shara án men bıge ulasyp, jınalǵan halyq Naýryz meıramyn erekshe sán-saltanatpen atap ótti.
