جۇما كۇنى كەشكە ستامبۇلدا سوڭعى ون جىلداعى ەڭ ءىرى نارازىلىق اكتسياسى ءوتتى، دەپ حابارلايدى “ادىرنا” ۇلتتىق پورتالى.
مىڭداعان ادام قالا مەرى ەكرەم يماموعلۋنىڭ قاماۋعا الىنۋىنا قارسىلىق ءبىلدىرىپ، كوشەگە شىقتى. وعان «جەمقورلىق» جانە «تەرروريستىك ۇيىمدارعا كومەكتەستى» دەگەن ايىپ تاعىلعان. وسى ءىس اياسىندا 100-دەن استام ادام، سونىڭ ىشىندە ساياساتكەرلەر، جۋرناليستەر جانە كاسىپكەرلەر دە قاماۋعا الىندى.
تۇركيا پرەزيدەنتى رەجەپ تايىپ ەردوعان نارازىلىق تولقىنىن قاتاڭ سىنعا الدى. ول جۇما كۇنى جاساعان مالىمدەمەسىندە ۇكىمەت «ۆانداليزم مەن كوشە تەررورىنا» جول بەرمەيتىنىن جانە قوعامدىق ءتارتىپتىڭ بۇزىلۋىنا قارسى تۇراتىنىن ايتتى.
قارسىلىق شەرۋلەرى ەلدە ءۇشىنشى كۇن قاتارىنان جالعاسۋدا. ستامبۇلداعى نارازىلىق اكتسياسىندا ءسوز سويلەگەن رەسپۋبليكالىق حالىق پارتياسىنىڭ (رنپ) جەتەكشىسى وزگۇر وزەل:
«بۇل رنپ-نىڭ ميتينگى ەمەس، مۇندا ءتۇرلى پارتيا وكىلدەرى جينالىپ، يماموعلۋعا قولداۋ بىلدىرۋدە. ەردوعان سوت جۇيەسىن ساياسي قارۋ رەتىندە پايدالانىپ، يماموعلۋعا قىسىم كورسەتكىسى كەلەدى، بىراق ءبىز بۇعان جول بەرمەيمىز»، – دەدى.
دەگەنمەن، پوليتسيا شەرۋشىلەردى تاراتۋ ءۇشىن كوزدەن جاس اعىزاتىن گاز بەن پلاستيكالىق وقتار قولداندى. ۇقساس قاقتىعىستار انكارا مەن يزميردە دە ورىن الدى. ىشكى ىستەر ءمينيسترى الي ەرلىكايا ح الەۋمەتتىك جەلىسىندە 97 شەرۋشىنىڭ قاماۋعا الىنعانىن جانە ينتەرنەتتە زورلىق-زومبىلىققا شاقىردى دەگەن كۇدىكپەن 54 ادامنىڭ ۇستالعانىن حابارلادى. قاقتىعىستار كەزىندە 16 پوليتسەي جاراقات العان.
ەكرەم يماموعلۋ وتكەن جىلى وتكەن جەرگىلىكتى سايلاۋدا جەڭىسكە جەتىپ، ەكىنشى مەرزىمگە قايتا سايلانعان بولاتىن. بۇل – ەردوعان بيلىككە كەلگەننەن بەرى بيلەۋشى پارتيانىڭ ەل بويىنشا العاش رەت جەڭىلىس تابۋى ەدى. ساراپشىلار يماموعلۋنى 2028 جىلعى پرەزيدەنت سايلاۋىندا ەردوعاننىڭ نەگىزگى قارسىلاسى بولۋى مۇمكىن دەپ ەسەپتەگەن.
رنپ جەكسەنبى كۇنى پارتيا اتىنان پرەزيدەنتتىككە ۇمىتكەردى جاريالايتىنىن مالىمدەدى. بۇگىندە بۇل لاۋازىمعا باستى ۇمىتكەر – قاماۋدا وتىرعان ەكرەم يماموعلۋ. وعان قولداۋ ءبىلدىرۋ ءۇشىن پارتيا ەل كولەمىندە سيمۆوليكالىق سايلاۋ وتكىزۋدى جانە داۋىس بەرۋ جاشىكتەرىن ورنالاستىرۋدى جوسپارلاپ وتىر.
