باتىس قازاقستان وبلىسىنىڭ اكىمى ناريمان تورەعاليەۆ ناۋرىز مەرەكەسى قارساڭىندا ورال قالاسىنىڭ تۇرعىندارىنا 120 جاڭا پاتەردىڭ كىلتىن تابىستادى. سالتاناتتى ءراسىم تۇرعىن ءۇي ينفراقۇرىلىمى قارقىندى دامىپ كەلە جاتقان «اقجايىق» شاعىن اۋدانىندا ءوتتى.
جاڭا قونىس يەلەرىن قۇتتىقتاي وتىرىپ، اكىم ازاماتتاردى قولجەتىمدى باسپانامەن قامتاماسىز ەتۋ مەملەكەت باسشىسى قاسىم-جومارت توقاەۆ قويعان نەگىزگى مىندەتتەردىڭ ءبىرى ەكەنىن اتاپ ءوتتى.
قازىرگى تاڭدا باتىس قازاقستان وبلىسىندا بۇل باعىتتا جۇيەلى جۇمىستار جۇرگىزىلۋدە. 2024 جىلى ورال قالاسىندا بيۋدجەت ەسەبىنەن 628 پاتەرلىك بەس كوپقاباتتى تۇرعىن ءۇي پايدالانۋعا بەرىلدى، ال اۋىلدىق جەرلەردە 805 تۇرعىن ءۇي ساتىپ الىنىپ، تۇرعىندارعا تابىستالدى. سونداي-اق، سۋ تاسقىنىنان زارداپ شەككەندەر ءۇشىن 900 ءۇي سالىنىپ، 2 مىڭنان استام پاتەر ساتىپ الىندى.
بيىل 19 كوپقاباتتى تۇرعىن ءۇيدىڭ قۇرىلىسىن اياقتاۋ جوسپارلانۋدا، بۇل تاعى 950 وتباسىنى باسپانامەن قامتاماسىز ەتەدى.. بۇدان بولەك، رەسپۋبليكالىق بيۋدجەت ەسەبىنەن الەۋمەتتىك وسال توپتاعى ازاماتتار ءۇشىن 205 پاتەر ساتىپ الۋ كوزدەلىپ وتىر.
“بۇگىن «اقجايىق» شاعىن اۋدانىندا 120 پاتەرلىك جاڭا ءۇيدى پايدالانۋعا بەرىپ جاتىرمىز. بۇل ناۋرىز مەيرامى قارساڭىندا جەرلەستەرىمىز ءۇشىن ۇلكەن قۋانىش. مۇندا بارلىعى 25 كوپقاباتتى تۇرعىن ءۇي سالۋ جوسپارلانۋدا. جالپى، جىل سوڭىنا دەيىن بيۋدجەت قاراجاتى ەسەبىنەن 1500-دەن استام پاتەردى پايدالانۋعا بەرۋ جوسپارلانۋدا. قازىرگى ۋاقىتتا ونىڭ سەگىزىنىڭ قۇرىلىسى اياقتالدى. سونداي-اق ۇيلەرى قاۋىپتى دەپ تانىلعان تۇرعىندارعا 180 پاتەر ساتىپ الامىز»، - دەدى ناريمان تورەعاليەۆ..
جاڭا قونىس يەلەرىنىڭ ءبىرى گۇلزيرا تۇرتاەۆا ءوز اسەرىمەن ءبولىسىپ، مەملەكەتتىك قولداۋدىڭ ماڭىزدىلىعىن اتاپ ءوتتى.
«بۇگىن – ءبىزدىڭ وتباسىمىز ءۇشىن ەرەكشە كۇن، سەبەبى ءبىز ءوز باسپانامىزعا يە بولدىق. بۇل – ءبىز كوپتەن كۇتكەن ارمانىمىز ەدى. ازاماتتارعا وسىنداي مۇمكىندىك جاساپ وتىرعان پرەزيدەنت قاسىم-جومارت كەمەلۇلىنا العىسىمىز شەكسىز»، – دەدى ول.
ايتا كەتەيىك، «اقجايىق» شاعىن اۋدانى قارقىندى دامىپ كەلەدى. مۇندا ءبىلىم بەرۋ، دەنساۋلىق ساقتاۋ، مادەنيەت جانە سپورت نىساندارىن سالۋ جوسپارلانعان.
2024 جىلدىڭ سوڭىندا 150 ورىندىق زاماناۋي وڭالتۋ ورتالىعى پايدالانۋعا بەرىلدى، ال الداعى ۋاقىتتا حالىقتىڭ ءومىر ساپاسىن ارتتىرۋعا باعىتتالعان جاڭا الەۋمەتتىك ماڭىزى بار نىسانداردىڭ قۇرىلىسى قولعا الىنباق.
