Batys Qazaqstan oblysynyń ákimi Narıman Tóreǵalıev Naýryz merekesi qarsańynda Oral qalasynyń turǵyndaryna 120 jańa páterdiń kiltin tabystady. Saltanatty rásim turǵyn úı ınfraqurylymy qarqyndy damyp kele jatqan «Aqjaıyq» shaǵyn aýdanynda ótti.
Jańa qonys ıelerin quttyqtaı otyryp, ákim azamattardy qoljetimdi baspanamen qamtamasyz etý Memleket Basshysy Qasym-Jomart Toqaev qoıǵan negizgi mindetterdiń biri ekenin atap ótti.
Qazirgi tańda Batys Qazaqstan oblysynda bul baǵytta júıeli jumystar júrgizilýde. 2024 jyly Oral qalasynda bıýdjet esebinen 628 páterlik bes kópqabatty turǵyn úı paıdalanýǵa berildi, al aýyldyq jerlerde 805 turǵyn úı satyp alynyp, turǵyndarǵa tabystaldy. Sondaı-aq, sý tasqynynan zardap shekkender úshin 900 úı salynyp, 2 myńnan astam páter satyp alyndy.
Bıyl 19 kópqabatty turǵyn úıdiń qurylysyn aıaqtaý josparlanýda, bul taǵy 950 otbasyny baspanamen qamtamasyz etedi.. Budan bólek, respýblıkalyq bıýdjet esebinen áleýmettik osal toptaǵy azamattar úshin 205 páter satyp alý kózdelip otyr.
“Búgin «Aqjaıyq» shaǵyn aýdanynda 120 páterlik jańa úıdi paıdalanýǵa berip jatyrmyz. Bul Naýryz meıramy qarsańynda jerlesterimiz úshin úlken qýanysh. Munda barlyǵy 25 kópqabatty turǵyn úı salý josparlanýda. Jalpy, jyl sońyna deıin bıýdjet qarajaty esebinen 1500-den astam páterdi paıdalanýǵa berý josparlanýda. Qazirgi ýaqytta onyń segiziniń qurylysy aıaqtaldy. Sondaı-aq úıleri qaýipti dep tanylǵan turǵyndarǵa 180 páter satyp alamyz», - dedi Narıman Tóreǵalıev..
Jańa qonys ıeleriniń biri Gúlzıra Turtaeva óz áserimen bólisip, memlekettik qoldaýdyń mańyzdylyǵyn atap ótti.
«Búgin – bizdiń otbasymyz úshin erekshe kún, sebebi biz óz baspanamyzǵa ıe boldyq. Bul – biz kópten kútken armanymyz edi. Azamattarǵa osyndaı múmkindik jasap otyrǵan Prezıdent Qasym-Jomart Kemelulyna alǵysymyz sheksiz», – dedi ol.
Aıta keteıik, «Aqjaıyq» shaǵyn aýdany qarqyndy damyp keledi. Munda bilim berý, densaýlyq saqtaý, mádenıet jáne sport nysandaryn salý josparlanǵan.
2024 jyldyń sońynda 150 oryndyq zamanaýı ońaltý ortalyǵy paıdalanýǵa berildi, al aldaǵy ýaqytta halyqtyń ómir sapasyn arttyrýǵa baǵyttalǵan jańa áleýmettik mańyzy bar nysandardyń qurylysy qolǵa alynbaq.
