وسىدان 6 جىل بۇرىن ءدال وسى كۇنى نۇرسۇلتان نازارباەۆ پرەزيدەنت قىزمەتىنەن كەتەتىنىن ايتىپ مەملەكەتتىك تەلەارنادان ۇندەۋ جولداعان بولاتىن، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى باقىتجان بازاربەك «نازارباەۆ بيلىكتەن كەتكەننەن كەيىن ءوزىن قالاي ۇستادى؟» دەگەن سۇراققا جاۋاپ بەردى. ءماجىلىس دەپۋتاتى بۇل ساۋالدىڭ وتە قيىن سۇراق ەكەنىن ەسكەرتتى.
«سەبەبى ءبىز بىرىنشىدەن، تەلەديداردان كورىپ جاتقان دۇنيەلەردى ەسكەرەمىز عوي. ونى بولاشاقتا تاريحشىلار ماتەريالداردى زەرتتەپ، باعاسىن بەرە جاتار. ءوز باسىم ول جاڭا پرەزيدەنتتى قولداۋدى كۇشەيتۋ كەرەك ەدى دەپ ويلايمىن. ول رەسمي تۇردە بيلىكتەن كەتىپ، تەلەديداردان جاڭا پرەزيدەنتتى قولداۋعا شاقىردى. بىراق ەكراننىڭ ارعى جاعىنداعى دۇنيەلەردى ءبىز بىلمەيمىز عوي. سول سەبەپتى بۇل سۇراققا ءۇزىلدى-كەسىلدى ناقتى جاۋاپ بەرە المايمىن. مەن زاڭگەر رەتىندە ناقتى ماتەريالدارعا سۇيەنەمىن. بىراق زاڭگەر رەتىندە مەندە دە كوپتەگەن سۇراقتار تۋىندايدى. ارىپتەستىم ەرمۇرات باپي «ەسكى قازاقستانعا» قاتىستى بىرنەشە دەپۋتاتتىق ساۋال جولدادى. سەبەبى باس كوتەرەتىن ءار ءتۇرلى ءىس-قيمىلدار جاساپ جاتىر. سوندىقتان دا بارلىعىمىز پرەزيدەنت قاسىم-جومارت كەمەلۇلى توقاەۆتىڭ جانىنا توپتاسىپ، جاردەمشى رەتىندە كومەكتەسۋىمىز كەرەك. ەگەر دە «ادىلەتتى قازاقستان» قۇرامىز دەسەك، ءبىز جاڭا وزگەرىستەردى ەنگىزۋىمىز كەرەك. بۇگىن پارلامەنت ماجىلىسىنە كەلىپ، جاڭا وزگەرىستەر بار ەكەنىن اشىق ايتىپ وتىرمىن»، – دەدى ول.
سوڭعى جىلدارى ەكس-پرەزيدەنت قازاقستان حالقىن تاۋەلسىزدىك كۇنىمەن قۇتتىقتاماي ءجۇر. مۇنىڭ سەبەبى نەدە؟ ەكس-پرەزيدەنت ەلگە وكپەلى مە؟
«جەكە ءوز باسىم ەگەر ەكس-پرەزيدەنت بولسام، ەلدى قۇتتىقتار ەدىم. ماسەلەن اقش ەكس-پرەزيدەنتتەرىنە قاراڭىزدارشى، ولار رەسپۋبليكا جانە دەموكراتيالىق پارتيا رەتىندە قىرعي-قاباق بولسا دا، شەشۋشى ساتتە كەلەسى پرەزيدەنتتىڭ يناۋگۋراتسيانا كەلىپ، ساتتىلىك تىلەيدى. كۇنى بۇرىن ءبىر-ءبىرىن سىناپ جاماندايدى، بىراق شەشۋشى ساتتە بارلىق زاڭ تالاپتارىن ساقتاپ، قول الىسىپ، جىلى امانداسادى. بىزدە سونداي ساياسي مادەنيەتكە جەتۋىمىز كەرەك. وكىنىشكە قاراي ونداي ساياسي مادەنيەتكە ءبىز ءالى جەتە قويعان جوقپىز. ءبىزدىڭ بۇرىنعى ەكس-پرەزيدەنتىمىزدىڭ ەشكىمگە وكپەسى بولماۋى كەرەك. ءبىر ءوزى مەملەكەتتى ءبىر عاسىردىڭ 1/3 باسقاردى»، – دەدى ول.
