Osydan 6 jyl buryn dál osy kúni Nursultan Nazarbaev prezıdent qyzmetinen ketetinin aıtyp memlekettik telearnadan úndeý joldaǵan bolatyn, dep habarlaıdy "Adyrna" ulttyq portaly.
Májilis depýtaty Baqytjan Bazarbek «Nazarbaev bılikten ketkennen keıin ózin qalaı ustady?» degen suraqqa jaýap berdi. Májilis depýtaty bul saýaldyń óte qıyn suraq ekenin eskertti.
«Sebebi biz birinshiden, teledıdardan kórip jatqan dúnıelerdi eskeremiz ǵoı. Ony bolashaqta tarıhshylar materıaldardy zerttep, baǵasyn bere jatar. Óz basym ol jańa prezıdentti qoldaýdy kúsheıtý kerek edi dep oılaımyn. Ol resmı túrde bılikten ketip, teledıdardan jańa prezıdentti qoldaýǵa shaqyrdy. Biraq ekrannyń arǵy jaǵyndaǵy dúnıelerdi biz bilmeımiz ǵoı. Sol sebepti bul suraqqa úzildi-kesildi naqty jaýap bere almaımyn. Men zańger retinde naqty materıaldarǵa súıenemin. Biraq zańger retinde mende de kóptegen suraqtar týyndaıdy. Áriptestim Ermurat Bapı «Eski Qazaqstanǵa» qatysty birneshe depýtattyq saýal joldady. Sebebi bas kóteretin ár túrli is-qımyldar jasap jatyr. Sondyqtan da barlyǵymyz prezıdent Qasym-Jomart Kemeluly Toqaevtyń janyna toptasyp, járdemshi retinde kómektesýimiz kerek. Eger de «Ádiletti Qazaqstan» quramyz desek, biz jańa ózgeristerdi engizýimiz kerek. Búgin parlament májilisine kelip, jańa ózgerister bar ekenin ashyq aıtyp otyrmyn», – dedi ol.
Sońǵy jyldary eks-prezıdent Qazaqstan halqyn Táýelsizdik kúnimen quttyqtamaı júr. Munyń sebebi nede? Eks-prezıdent elge ókpeli me?
«Jeke óz basym eger eks-prezıdent bolsam, eldi quttyqtar edim. Máselen AQSh eks-prezıdentterine qarańyzdarshy, olar respýblıka jáne demokratııalyq partııa retinde qyrǵı-qabaq bolsa da, sheshýshi sátte kelesi prezıdenttiń ınaýgýraııana kelip, sáttilik tileıdi. Kúni buryn bir-birin synap jamandaıdy, biraq sheshýshi sátte barlyq zań talaptaryn saqtap, qol alysyp, jyly amandasady. Bizde sondaı saıası mádenıetke jetýimiz kerek. Ókinishke qaraı ondaı saıası mádenıetke biz áli jete qoıǵan joqpyz. Bizdiń burynǵy eks-prezıdentimizdiń eshkimge ókpesi bolmaýy kerek. Bir ózi memleketti bir ǵasyrdyń 1/3 basqardy», – dedi ol.
