17 ناۋرىزدا مەركى اۋىلىندا ورنالاسقان «نۇراي» مەكتەپكە دەيىنگى ءبىلىم بەرۋ ورتالىعىنىڭ 10 تاربيەلەنۋشىسى جۇقپالى اۋرۋلار بولىمىنە جەتكىزىلگەن. زارداپ شەككەندەر اراسىندا ءۇش ايلىق ءسابي مەن مەكتەپ وقۋشىلارى بار، دەپ حابارلايدى "ادىرنا" ۇلتتىق پورتالى.
ايماق اكىمدىگىنىڭ ءباسپاسوز قىزمەتىنىڭ مالىمەتىنشە، قازىرگى ۋاقىتتا اۋرۋحانادا 14 بالا مەن ءبىر ەرەسەك ادام ەم قابىلداپ جاتىر. توعىز بالا ءۇي جاعدايىندا ەم الۋدا. تاعى ءبىر بالا جان-جاقتى تەكسەرۋ مەن ءارى قاراي ەم قابىلداۋ ءۇشىن وبلىستىق ورتالىققا جەتكىزىلگەن.
توعىز بالادا جەدەل ىشەك ينفەكتسياسى، بىرەۋىندە ەنتەروۆيرۋستىق ينفەكتسيا انىقتالعان.
«اۋرۋحاناعا جەتكىزىلگەندەردىڭ اراسىندا بالاباقشانىڭ 10 تاربيەلەنۋشىسى، ءۇش ايلىق ءسابي جانە ءۇش مەكتەپ وقۋشىسى بار»، – دەپ حابارلادى جامبىل وبلىسى اكىمدىگى.
وبلىس اكىمى ەربول قاراشوكەەۆ وقيعانىڭ سەبەپتەرىن زەرتتەۋ ءۇشىن جۇمىس توبىن قۇرۋدى تاپسىردى. توپ مۇشەلەرى بالالاردىڭ ۇيلەرىنە بارىپ، ولاردىڭ جاعدايىن انىقتاپ، اتا-انالارىمەن سۇحباتتاسۋدا.
«مەركى اۋداندىق سانيتارلىق-ەپيدەميولوگيالىق باقىلاۋ باسقارماسى تەكسەرۋ جۇرگىزىپ، بارلىق قاجەتتى سىنامالاردى الدى. قازىر ماماندار ساراپتاما قورىتىندىسىن كۇتۋدە»، – دەپ مالىمدەدى اكىمدىك وكىلدەرى.
قاراشوكەەۆ بۇل جاعدايدى جەكە باقىلاۋىنا الاتىنىن ايتىپ، كىنالىلەردىڭ جاۋاپقا تارتىلاتىنىن ەسكەرتتى.
ورتالىقتىڭ قىزمەتى ەكى كۇنگە توقتاتىلعان. عيماراتتا دەزينفەكتسيا جۇمىستارى جۇرگىزىلۋدە.
