مەملەكەتكە وپاسىزدىق جاساعانى ءۇشىن سوتتالعان ۇلتتىق قاۋىپسىزدىك كەڭەسىنىڭ بۇرىنعى توراعاسى كارىم ءماسىموۆتىڭ ءىسى جابىق كۇيىندە قالادى. بۇل تۋرالى ۇلتتىق قاۋىپسىزدىك كوميتەتى Informburo.kz-ءتىڭ ساۋالىنا بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
2022 جىلى ەكس-شەنەۋنىككە قاتىستى قر قك 218-بابى «قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭداستىرۋ (جىلىستاتۋ)» جانە 366-بابى «اسا ءىرى كولەمدە پارا الۋ» بويىنشا سوتقا دەيىنگى تەرگەۋ جۇرگەن ەدى.
ءماسىموۆتىڭ جابىق كەلىسىمشارت بويىنشا شەت مەملەكەت وكىلىنەن 2 ملن اقش دوللارى سوماسىندا پارا العانى انىقتالدى. بۇل اقشا گونكونگتان قازاقستان ۇلتتىق بانكىنە قايتارىلدى. ودان بولەك، ونىڭ پرەمەر-مينيستر بولعان كەزىندە بيزنەس-قۇرىلىمنىڭ بىرىنەن قۇنى 2,5 ملرد تەڭگە بولاتىن ەليتالىق تۇرعىن ءۇي مەن جەر تەلىمىن ساتىپ العانى ايتىلدى.
ۇقك-نىڭ بۇرىنعى باسشىسى مەملەكەتكە وپاسىزدىق جاسادى جانە بيلىكتى باسىپ الماق بولدى دەگەن ايىپپەن سوتتالعاننان كەيىن دە بۇل ەكى بوپ بويىنشا تەرگەۋ ءارى قاراي جالعاستى. ۇلتتىق قاۋىپسىزدىك كوميتەتى ونىڭ ىقتيمال شەتەلدىك اكتيۆتەرىن ىزدەستىردى.
كەيىنىرەك كارىم ءماسىموۆ پەن ونىڭ بۇرىنعى ورىنباسارلارى سوت ۇكىمىنە قاتىستى اپپەلياتسيالىق شاعىم تۇسىرگەن بولاتىن. الايدا سوت ونى قاناعاتتاندىرۋدان باس تارتتى. دەسە دە، ماسىموۆكە قاتىستى سىبايلاس جەمقورلىق ىستەرى بويىنشا تەرگەۋ ناتيجەسى جاريالانبادى.
2025 جىلدىڭ 10 اقپانىندا قايتارىلعان اكتيۆتەردى باسقارۋ جونىندەگى كومپانيا سىبايلاس جەمقورلىق ىستەرىن تەرگەۋ بارىسىندا كارىم ماسىموۆتەن تاركىلەنگەن ءۇيدى ساتۋعا شىعاردى. الايدا ءزاۋلىم سارايدى ساتىپ الۋشى تابىلماي، اۋكتسيون وتپەدى. كەزەكتى ساۋدا-ساتتىق 28 ناۋرىزدا ۇيىمداستىرىلماق.
Informburo.kz ءماسىموۆ ءىسىنىڭ قاي ساتىدا ەكەنىن جانە بۇرىن ودان تاركىلگەنگەن ءۇي قانداي نەگىزدە قايتارىلعان اكتيۆتەردى باسقارۋ كومپانياسىنا بەرىلگەنىن انىقتاۋ ءۇشىن قۇزىرلى ورگانعا ساۋال جولدادى.
«كارىم ماسىموۆكە قاتىستى قىلمىستىق كودەكستىڭ اتالعان باپتارى بويىنشا سوتقا دەيىنگى تەرگەۋ جۇرگىزىلدى. ىستە مەملەكەتتىك قۇپيالاردى قۇرايتىن مالىمەتتەر بار ەكەنىن ەسكەرە وتىرىپ، وزگە دە اقپارات جاريا ەتىلۋگە جاتپايدى»،– دەلىنگەن جاۋاپتا.
ۇقك ءىستىڭ ەگجەي-تەگجەيىن ءبىلۋ ءۇشىن باس پروكۋراتۋراعا حابارلاسۋدى ۇسىنعان. الايدا باس پروكۋراتۋرا رەسمي ساۋالدى ۇلتتىق قاۋىپسىزدىك كوميتەتىنە قايتارىپ، سۇراقتاردى جاۋاپسىز قالدىرعان.
