استانادا مۋزىكالىق جاس كورەرمەن تەاترىندا 16 ناۋرىز – شاڭىراق كۇنىنە وراي، تەاتر قابىرعاسىندا تانىسىپ، تابىسقان ون التىنشى جۇپتىڭ اق نەكەسى قيىلدى. ءىس-شارا اتا-بابالارىمىزدا «شاڭىراق كوتەرۋ» اتتى ەرەكشە ءداستۇر-سالتىن ناسيحاتتاۋدى ماقسات تۇتىپ وتىر.
تەاتردا ءبىر-بىرىنە ۇيلەنىپ وتباسىن قۇرعان 15 جۇپ بار. ال بۇگىنگى «شاڭىراق كۇنى» تەاتردا تابىسقان 16-جۇپ ايدوس اماندىق پەن ايدانا بولاتتىڭ نەكەلەرىن قيۋ ءراسىمى ءوتتى.
اتالعان شاراعا، قازاق قىزدارىنىڭ سۇلۋلىق ەتالونىنا اينالعان قىز جىبەگى، قازاق كسر ەڭبەك سىڭىرگەن ءارتيسى، قۇرمەت جانە پاراسات وردەندەرىنىڭ يەگەرى مەرۋەرت وتەكەشەۆا، قازاقستاننىڭ ەڭبەك سىڭىرگەن قايراتكەرلەرى قانات پەن سۆەتا ايتباەۆتار جانە استانا قالاسى، ىرىسكەلدى قاجى مەشىتىنىڭ باس يمامى، بەلگىلى ءدىنتانۋشى-عالىم نۇرلان بايجىگىتۇلى قاتىستى.
مۋزىكالىق جاس كورەرمەن تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى اسحات ماكسيمۇلى:
-«كەش جارىق، ونەر سۇيەر قاۋىم! ءبىزدىڭ تەاترىمىزدىڭ جاناشىرلارى! ءبىزدىڭ ۇجىمىمىزدا بىلتىردان باستاپ ەرەكشە ناۋرىزناما باستالىپ جاتىر. قازاقتىڭ ۇلتتىق قۇندىلىقتارىن، رۋحاني كەلبەتىمىزدى پاش ەتەتىن ۇلكەن شارالار ءوتىپ جاتىر. تەاترىمىز اشىلعالى ءتورت جىل جارىمداي ۋاقىت بولدى. وسى ارالىقتا تەك سپەكتاكلدەردى ساحنالاۋ عانا ەمەس، ءبىزدىڭ تەاترىمىز ۇلكەن شاڭىراققا اينالدى. تەاتردا تەك قانا 15 وتباسى ەمەس، 30 ادام ءبىر-بىرىمەن ۇيلەسىپ، شاڭىراق كوتەردى.
بۇگىن وتباسىن قۇرىپ، ۇلكەن ءومىر جولىنا قول ۇستاسىپ بىرگە شىققان قوس بالامىزعا سەزىمنىڭ اقتىعىن بەرسىن، كوڭىلدىڭ پاكتىگىن بەرسىن! ەكەۋىنە ونەر جولىندا دا، ءومىر جولىندا دا، ارمان دا ماقسات تا ورتاق بولسىن! جۇپتارىڭىز ەشقاشان جازىلماسىن!»،- دەپ جاستارعا جۇرەكجاردى لەبىزىن ارنادى.
شارا بارىسىندا نەكە قيۋ راسىمىمەن قاتار اندەر ايتىلىپ، كۇي تارتىلدى. جاس وتباسىعا باتا بەرىلىپ، تىلەكتەر ايتىلدى. وتباسىلىق قۇندىلىقتار دارىپتەلدى.
ىرىسكەلدى قاجى مەشىتىنىڭ باس يمامى، بەلگىلى ءدىنتانۋشى-عالىم نۇرلان بايجىگىتۇلى:
- «ادام اتا مەن حاۋا اناداي، مۇحاممەد پايعامبار مەن حاديشاداي، حان ابىلقايىر مەنەن بوپاي انامىزداي، تاۋكە حان مەن ساندىق انامىزداي، جاڭگىر حان مەن ءباتيما انامىزداي، ابىلاي مەن سايمان انامىزداي، قوبىلاندى مەن قۇرتقا انامىزداي، يساتاي مەن مىلقىم انامىزداي، ساليقالى ءومىر بەرىپ، ءۇبىرلى ءشۇبىرلى قىلىپ، ءتىل-كوزدەن ساقتاپ،ءبىر جاستىقتا قارتايىپ اللا تاعالا سۇيگەن جۇپتاردان بولۋعا ءناسىپ ەتسىن! اۋمين!»،-دەپ اقباتاسى مەن بىرگە مۇسىلمانشا نەكە قيۋ ءراسىمىن جاسادى.
ال، شاڭىراق كوتەرىپ جاتقان ايدوس اماندىقتىڭ ايتۋىنشا، ناۋرىز مەرەكەسىنىڭ جاڭا تۇجىرىمداماسى اياسىنداعى «شاڭىراق كۇنى» جالپىۇلتتىق وتباسىلىق قۇندىلىقتار مەن كىرشىكسىز ماحاببات كۇنىنە اينالادى دەۋگە نەگىز بار.
-«شاڭىراق كۇنى قازاقستاندىقتاردىڭ جاس ۇرپاقتى تاربيەلەۋ مادەنيەتىن كورسەتە وتىرىپ، ولاردىڭ بويىندا پاتريوتيزم مەن ادامگەرشىلىكتى قالىپتاستىرۋعا ۇندەيدى. بۇگىن مۇسىلمانشا نەكەمىزدى، زاڭدى نەكەمىزدى كيەلى ساحنادا شاڭىراق كۇنىندە قيىپ جاتىرمىز. ءبىز تەاتردا تابىسقان 16-جۇپپىز. بۇل ءبىز ءۇشىن ەكى ەسە باقىت. الدىمىزدا ۇيلەنگەن اعا-اپكەلەرىمىز قازىر ءۇبىرلى-ءشۇبىرلى، بەرەكەسى مەن بىرلىگى جاراسقان جاراسىمدى وتباسىعا اينالىپ وتىر. الداعى ۋاقىتتا دا وسى يگى ءداستۇر جالعاسادى دەپ ويلايمىز», - دەدى ول.
ۇلكەن ومىرگە قادام باسقان جۇپ قالاي تانىسقاندارىن ايتىپ بەردى.
-«وسى تەاتردا 2023 جىلدان باستاپ جۇمىس ىستەپ كەلە جاتىرمىز. جارىمنىڭ اتى – ايدانا بولات. ۋنيۆەرسيتەت قابىرعاسىندا تانىسقان بولاتىنبىز. ۋنيۆەرسيتەتكە تالاپكەر بولىپ كەلىپ تۇرعانىمىزدا تانىسىپ، دوس بولىپ كەتتىك. كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە، اسحات ماەميروۆ شەبەرحاناسىندا بىرگە وقىعانبىز. ەڭ العاش تانىسقاندا “ميسس كوكشەتاۋ” ەكەنىن ەستىپ، ماعان قاراي ما ەكەن؟” دەپ، باتىلىم جەتپەدى. 2 جىل دوس بولىپ، ارالاسقاننان كەيىن بارىپ، سەزىمىمدى ءبىلدىرىپ، قىزىم بولۋعا ۇسىنىس جاسادىم، ەندى، مىنە، شاڭىراق كوتەرگەلى وتىرمىز»،- دەدى ايدوس.
مارتەبەلى قوناقتارىمىز جاستارعا جۇرەكجاردى لەبىزدەرىن ءبىلدىرىپ، بىر-بىرىنە دەگەن ىڭكار سەزىمدەرى ماڭگىلىك بولۋىن، ەل مەن جۇرتتىڭ تەك العىستارىن الۋىن، ءومىر جولىندا اسپاندارى اشىق بولۋىن تىلەدى.
قازاق مادەنيەتىندە شاڭىراقتىڭ قادىر-قاسيەتى ايرىقشا. ول – ءارى اسپان كۇمبەزى، ءارى ءۇي-جاي، ءارى تىرەك، ءارى باقۋاتتىلىق پەن قاۋىپسىزدىك جانە ۇرپاقتار ساباقتاستىعى.
