Astanada Mýzykalyq jas kórermen teatrynda 16 naýryz – Shańyraq kúnine oraı, teatr qabyrǵasynda tanysyp, tabysqan on altynshy juptyń aq nekesi qıyldy. Is-shara ata-babalarymyzda «Shańyraq kóterý» atty erekshe dástúr-saltyn nasıhattaýdy maqsat tutyp otyr.
Teatrda bir-birine úılenip otbasyn qurǵan 15 jup bar. Al búgingi «Shańyraq kúni» teatrda tabysqan 16-jup Aıdos Amandyq pen Aıdana Bolattyń nekelerin qııý rásimi ótti.
Atalǵan sharaǵa, qazaq qyzdarynyń sulýlyq etalonyna aınalǵan Qyz Jibegi, Qazaq KSR Eńbek sińirgen artısi, Qurmet jáne Parasat ordenderiniń ıegeri Merýert Ótekesheva, Qazaqstannyń eńbek sińirgen qaıratkerleri Qanat pen Sveta Aıtbaevtar jáne Astana qalasy, Yryskeldi qajy meshitiniń bas ımamy, belgili dintanýshy-ǵalym Nurlan Baıjigituly qatysty.
Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri Ashat Maksımuly:
-«Kesh jaryq, óner súıer qaýym! Bizdiń teatrymyzdyń janashyrlary! Bizdiń ujymymyzda byltyrdan bastap erekshe Naýryznama bastalyp jatyr. Qazaqtyń ulttyq qundylyqtaryn, rýhanı kelbetimizdi pash etetin úlken sharalar ótip jatyr. Teatrymyz ashylǵaly tórt jyl jarymdaı ýaqyt boldy. Osy aralyqta tek spektaklderdi sahnalaý ǵana emes, bizdiń teatrymyz úlken shańyraqqa aınaldy. Teatrda tek qana 15 otbasy emes, 30 adam bir-birimen úılesip, shańyraq kóterdi.
Búgin otbasyn quryp, úlken ómir jolyna qol ustasyp birge shyqqan qos balamyzǵa sezimniń aqtyǵyn bersin, kóńildiń páktigin bersin! Ekeýine óner jolynda da, ómir jolynda da, arman da maqsat ta ortaq bolsyn! Juptaryńyz eshqashan jazylmasyn!»,- dep jastarǵa júrekjardy lebizin arnady.
Shara barysynda neke qııý rásimimen qatar ánder aıtylyp, kúı tartyldy. Jas otbasyǵa bata berilip, tilekter aıtyldy. Otbasylyq qundylyqtar dáripteldi.
Yryskeldi qajy meshitiniń bas ımamy, belgili dintanýshy-ǵalym Nurlan Baıjigituly:
- «Adam ata men Haýa anadaı, Muhammed paıǵambar men Hadıshadaı, Han Ábilqaıyr menen Bopaı anamyzdaı, Táýke han men Sandyq anamyzdaı, Jáńgir han men Bátıma anamyzdaı, Abylaı men Saıman anamyzdaı, Qobylandy men Qurtqa anamyzdaı, Isataı men Mylqym anamyzdaı, salıqaly ómir berip, úbirli shúbirli qylyp, til-kózden saqtap,bir jastyqta qartaıyp Alla taǵala súıgen juptardan bolýǵa násip etsin! Aýmın!»,-dep aqbatasy men birge musylmansha neke qııý rásimin jasady.
Al, shańyraq kóterip jatqan Aıdos Amandyqtyń aıtýynsha, Naýryz merekesiniń jańa tujyrymdamasy aıasyndaǵy «Shańyraq kúni» jalpyulttyq otbasylyq qundylyqtar men kirshiksiz mahabbat kúnine aınalady deýge negiz bar.
-«Shańyraq kúni qazaqstandyqtardyń jas urpaqty tárbıeleý mádenıetin kórsete otyryp, olardyń boıynda patrıotızm men adamgershilikti qalyptastyrýǵa úndeıdi. Búgin musylmansha nekemizdi, zańdy nekemizdi kıeli sahnada Shańyraq kúninde qıyp jatyrmyz. Biz teatrda tabysqan 16-juppyz. Bul biz úshin eki ese baqyt. Aldymyzda úılengen aǵa-ápkelerimiz qazir úbirli-shúbirli, berekesi men birligi jarasqan jarasymdy otbasyǵa aınalyp otyr. Aldaǵy ýaqytta da osy ıgi dástúr jalǵasady dep oılaımyz», - dedi ol.
Úlken ómirge qadam basqan jup qalaı tanysqandaryn aıtyp berdi.
-«Osy teatrda 2023 jyldan bastap jumys istep kele jatyrmyz. Jarymnyń aty – Aıdana Bolat. Ýnıversıtet qabyrǵasynda tanysqan bolatynbyz. Ýnıversıtetke talapker bolyp kelip turǵanymyzda tanysyp, dos bolyp kettik. Kúlásh Baıseıitova atyndaǵy Qazaq ulttyq óner ýnıversıtetinde, Ashat Maemırov sheberhanasynda birge oqyǵanbyz. Eń alǵash tanysqanda “Mıss Kókshetaý” ekenin estip, maǵan qaraı ma eken?” dep, batylym jetpedi. 2 jyl dos bolyp, aralasqannan keıin baryp, sezimimdi bildirip, qyzym bolýǵa usynys jasadym, endi, mine, shańyraq kótergeli otyrmyz»,- dedi Aıdos.
Mártebeli qonaqtarymyz jastarǵa júrekjardy lebizderin bildirip, bir-birine degen ińkár sezimderi máńgilik bolýyn, el men jurttyń tek alǵystaryn alýyn, ómir jolynda aspandary ashyq bolýyn tiledi.
Qazaq mádenıetinde shańyraqtyń qadir-qasıeti aıryqsha. Ol – ári aspan kúmbezi, ári úı-jaı, ári tirek, ári baqýattylyq pen qaýipsizdik jáne urpaqtar sabaqtastyǵy.
