قازاقستان پرەزيدەنتى قاسىم-جومارت توقاەۆ اقش پرەزيدەنتىنىڭ ءداستۇرلى مورالدىق قۇندىلىقتاردى قالپىنا كەلتىرۋگە باعىتتالعان جۇمىستارىنا قاتىستى پىكىر ءبىلدىردى، دەپ حابارلايدى “ادىرنا”
توقاەۆ ۇلتتىق قۇرىلتاي وتىرىسىندا سويلەگەن سوزىندە قازىرگى الەمدە جاھاندانۋدىڭ ىقپالى السىرەپ بارا جاتقانىن، ال مەملەكەتشىلدىك الدىڭعى قاتارعا شىعاتىنىن مالىمدەدى.
«جاھاندانۋ ۇدەرىسىنىڭ ءمان-ماڭىزى جوعالىپ بارادى. مەملەكەتتىك ۇلتشىلدىق، ىقپال جۇرگىزەتىن اۋماقتاردى بولىسكە سالۋ، الەمدىك ساياساتتا ايماقتارعا ءبولىنۋ ءۇردىسى الدىڭعى قاتارعا شىقتى. دەموكراتيالىق مورالدىق دەلىنىپ جۇرگەن قۇندىلىقتار، ونىڭ ىشىندە لگبت كوپتەگەن ەلگە ونداعان جىل بويى كۇشپەن تاڭىلىپ، سونىڭ جەلەۋىمەن حالىقارالىق ۇكىمەتتىك ەمەس ۇيىمدار مەن قورلار ارقىلى مەملەكەتتەردىڭ ىشكى ىسىنە اشىق ارالاسۋ بەلەڭ الدى. ونىڭ تۇپكى ماقساتى بار بولعانى ۇرلىق، ياعني سان ميللياردتىق بيۋدجەتتى قالتاعا باسۋ ەكەن. «دامۋ مەن دەموكراتيا»، «ادام قۇقىقتارى»، «ءباسپاسوز بوستاندىعى»، «سىبايلاس جەمقورلىققا قارسى كۇرەس» دەپ ۇرانداتىپ جۇرگەندەردىڭ ءبارىنىڭ دەرلىك جەكە بايلىعى جالاقىسىنىڭ مولشەرىنە ەش ساي كەلمەيدى. سوندىقتان پرەزيدەنت ترامپ باستاعان امەريكا اكىمشىلىگىنىڭ جاپپاي قىزمەت بابىن اسىرا پايدالانۋعا قاتىستى وقيعالاردى انىقتاۋعا جانە «تۇڭعيىق مەملەكەت» ۇعىمىنا ءتان ساياسي ەكىجۇزدىلىكتى اشكەرەلەۋگە، ءداستۇرلى مورالدىق قۇندىلىقتاردى قالپىنا كەلتىرۋگە باعىتتالعان جۇمىستارى قولداۋعا لايىق. اقش-تا جاسالىپ جاتقان شارۋانىڭ ءبارى بۇكىل الەمگە تىكەلەي اسەر ەتەتىنى بارشاعا ءمالىم»، - دەدى توقاەۆ.
