اعىمداعى جىلدىڭ سوڭىنا دەيىن «اگلومەراتسيالاردى دامىتۋ تۋرالى» جاڭا زاڭ قابىلدانادى. بۇل تۋرالى پرەزيدەنت قاسىم-جومارت توقاەۆ الماتى قالاسىنا جاساعان جۇمىس ساپارى كەزىندە ايتتى، دەپ حابارلايدى «ادىرنا» ءتىلشىسى.
مەملەكەت باسىشسى توقاەۆ الماتى حالقىمەن كەزدەسۋىندە: «بۇل ايماقتاردىڭ ەرەكشەلىگىن ەسكەرە وتىرىپ، الماتى اگلومەراتسياسى شەڭبەرىندە وڭدەۋ ونەركاسىبىن دامىتۋ كەرەك. وسى جىلدىڭ سوڭىنا دەيىن «اگلومەراتسيالاردى دامىتۋ تۋرالى» جاڭا زاڭ قابىلدانادى. بۇل زاڭ ەكى ايماقتىڭ اراسىنداعى ءوزارا تىعىز بايلانىستار ورناتۋعا نەگىز بولماق»،-دەگەن ويىن جەتكىزدى.
قاسىم-جومارت كەمەلۇلىنىڭ سوزىنە سۇيەنسەك، الەمنىڭ كوپتەگەن مەگاپوليستەرىندە كرەاتيۆتى يندۋستريالار ەكونوميكالىق ءوسۋدىڭ نەگىزگى قوزعاۋشى كۇشى بولىپ تابىلادى. بۇگىنگى تاڭدا ءبىزدىڭ تالانتتى ازاماتتارىمىز وسى سالادا شەتەلدە كەڭىنەن تانىمال ەكەن. وسىنى باستى نازارعا العان توقاەۆ، «ولاردىڭ ءوز ەلىمىزدە تولىققاندى دامۋى ءۇشىن بارلىق جاعداي جاساۋىمىز كەرەك», دەگەن پىكىرىن ورتاعا سالدى.
پرەزيدەنتتىڭ ايتۋىنشا، قازىردىڭ وزىندە قازاقستاننىڭ كرەاتيۆتى سەكتورىندا 19 مىڭنان استام كومپانيا جۇمىس ىستەيدى. بۇل رەتتە ەلىمىزدىڭ بارلىق IT-كومپانيالارىنىڭ 40% - دان استامى الماتىدا ورنالاسقان.
«مەگاپوليس تسيفرلىق كوشپەندىلەر ءۇشىن تارتىمدى ورتالىققا اينالادى. ازاماتتاردىڭ شىعارماشىلىق باستامالارىن ىسكە اسىرۋ ءۇشىن جاقىن ارادا قالادا كرەاتيۆتى حابتار مەن كلاستەرلەر ىسكە قوسىلادى. مەن اكىمدىكتىڭ باستاپقى كاپيتالداندىرۋى 10 ميلليارد تەڭگەنى قۇرايتىن قالالىق ۆەنچۋرلىق قور قۇرۋ تۋرالى يدەياسىن قولدايمىن. بۇل جوبانى جۇزەگە اسىرۋ ءۇشىن جەكە قاراجات تارتۋ ماڭىزدى»،-دەدى كەزدەسۋدە پرەزيدەنت.
جيىن بارىسىندا مەملەكەت باسشىسى شاھاردىڭ تۋريستىك الەۋەتى تۋرالى وي قاۋزادى.
«الماتىنىڭ سۇلۋلىعى مەن الۋان تۇرلىلىگى بويىنشا بىرەگەي تابيعاتى، باي تاريحي-مادەني مۇراسى بار. بۇل ىشكى جانە شەتەلدىك تۋريستەردى تارتۋ ءۇشىن جاقسى نەگىز بولىپ تابىلادى. كوروناۆيرۋستىق شەكتەۋلەر الىنىپ تاستالعاننان كەيىن الماتىدا تۋريستىك اعىننىڭ قارقىندى ءوسۋى بايقالادى. تەك ءبىرىنشى جارتىجىلدىقتا ىشكى تۋريستەر سانى 1,5 ەسە، شەتەلدىك تۋريستەر سانى 2,8 ەسە ءوستى. اشىلاتىن مۇمكىندىكتەردى ءتيىمدى پايدالانۋ كەرەك»،-دەدى قاسىم-جومارت توقاەۆ.
