بۋرابايدا وتكەن ۇلتتىق قۇرىلتايدىڭ ءتورتىنشى وتىرىسىندا قاسىم-جومارت توقاەۆ سالىق رەفورماسىنىڭ قاجەتتىگىن اتاپ ءوتتى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
«كاسىپكەرلەردىڭ ەكى نەگىزگى توبى بار: ءبىرىنشىسى – زاڭناماداعى ولقىلىقتاردى پايدالانىپ، سالىقتىق مىندەتتەمەلەرىن بارىنشا ازايتۋعا تىرىساتىندار، ەكىنشىسى – بارلىق سالىقتاردى ادال تولەيتىندەر. ارينە، ەكىنشى توپتاعى كاسىپكەرلەر باسەكەگە قابىلەتتىلىگى تومەن بولىپ قالادى. ۇكىمەت بيزنەستىڭ سالىقتان جالتارۋ ماقساتىندا بولشەكتەنۋى ماسەلەسىنە ورىندى نازار اۋداردى. وكىنىشكە قاراي، بۇل – كەڭ تارالعان قۇبىلىس. مىسالى، ءبىر مەيرامحانادا 3-4 شاعىن كاسىپورىن تىركەلگەن. ءتىپتى، باردىڭ ەسەپ ايىرىسۋ سورەسى دە بولەك شاعىن بيزنەس رەتىندە راسىمدەلگەن. شىن مانىندە، بيزنەستى بولشەكتەۋ – زاڭنامالىق ولقىلىقتاردىڭ سالدارى»، – دەدى توقاەۆ.
پرەزيدەنتتىڭ ايتۋىنشا، بۇل ماسەلە ۇكىمەت پەن دەپۋتاتتار تاراپىنان جەتكىلىكتى دەڭگەيدە زەرتتەلمەگەن. ول سالىق ساياساتى بويىنشا كورسەتكىشتەرگە نەگىزسىز سۇيەنۋدىڭ قاۋىپتى ەكەنىن اتاپ ءوتتى.
«ەلىمىزدە ەكى ميلليوننان استام سالىق تولەۋشى مەن جەكە كاسىپكەر تىركەلگەن دەپ ماقتانىشپەن ايتامىز. بىراق ولاردىڭ قانداي كاسىپورىندار ەكەنى، قالاي پايدا بولعانى، قانشا سالىق تولەيتىنى نەمەسە مۇلدە تولەمەيتىنى ساراپتالعان جوق»، – دەدى مەملەكەت باسشىسى.
سونىمەن قاتار، پرەزيدەنتتىڭ ايتۋىنشا، بۇل ماسەلە ۇكىمەت پەن دەپۋتاتتار تاراپىنان جەتكىلىكتى دەڭگەيدە زەرتتەلمەگەن. تاعى دا ادەمى كورسەتكىشتەردىڭ سوڭىنا ءتۇسىپ، ەلدە ەكى ميلليوننان استام سالىق تولەۋشى، جەكە كاسىپكەر تىركەلگەن دەپ ماقتانعا سالعانىن جەتكىزدى. سونداي-اق، ولاردىڭ قانداي كاسىپورىندار ەكەنى، قالاي پايدا بولعانى، قانشا سالىق تولەيتىنى جانە مۇلدە تولەمەيتىنى ساراپتالماعانىن ايتتى.
«ءادىل ءارى ءتيىمدى سالىق جۇيەسىن قۇرۋ ەلىمىزدىڭ بولاشاعىنا، كەيىنگى ۇرپاقتىڭ تۇرمىسىنا تىكەلەي اسەر ەتەتىنىن ۇعىنعان ءجون. بيلىك بيزنەسكە قولداۋ كورسەتىپ كەلدى، كورسەتە دە بەرەدى. بۇعان كۇمان بولماۋعا ءتيىس. بىراق بيزنەستىڭ ءوزى زاڭدى جانە زاڭسىز بولادى. ءبىز زاڭدى ساقتاۋ، تارتىپكە باعىنۋ كەرەك دەپ جاتامىز. ەندەشە ۇكىمەتتىڭ جانە جالپى بيلىكتىڭ قولداۋ شارالارىنىڭ يگىلىگىن، ءبىرىنشى كەزەكتە، ادال ءارى جاۋاپتى، ەڭ باستىسى، زاڭ اياسىندا جۇمىس ىستەيتىن كاسىپكەرلەر كورۋگە ءتيىس. سالىق رەفورماسىنا كەلسەك، باتىل شارالاردى ءدال قازىر قابىلداۋ كەرەك. ايتپەسە، بۇدان دا زور قيىندىققا تاپ بولامىز»، – دەدى پرەزيدەنت.
