وزبەكستان پرەزيدەنتى شاۆكات ميرزيوەۆ فرانتسيا پرەزيدەنتى ەممانۋەل ماكروننىڭ شاقىرۋىمەن پاريجگە مەملەكەتتىك ساپارمەن باردى، دەپ حابارلايدى "ادىرنا" ۇلتتىق پورتالى president.uz سايتىنا سىلتەپ.
وزبەكستان پرەزيدەنتىن فرانتسياعا كەلگەن ساتتە ونى رەسمي وكىلدەر مەن پاريج اسكەري وكرۋگىنىڭ قولباسشىلىعى سالتاناتتى تۇردە قارسى الدى. سونداي-اق، وزبەكستان دەلەگاتسياسى ورنالاسقان رەزيدەنتسيادا وقىپ، جۇمىس ىستەپ جۇرگەن وزبەك جاستارى قارسى الدى.
شاۆكات ميرزيوەۆ يۋنەسكو باس ديرەكتورى ودري ازۋلەمەن كەزدەسىپ، مادەني جانە ءبىلىم بەرۋ سالالارىنداعى بىرلەسكەن جوبالار تالقىلاندى.
وزبەكستان باستاماسىمەن اقپاراتقا قولجەتىمدىلىك جانە بالالار ءبىلىم بەرۋ ماسەلەلەرى بويىنشا قارارلار قابىلداندى. بۇحارا قالاسى يۋنەسكو-نىڭ "شىعارماشىلىق قالالار جەلىسىنە" قوسىلدى، ال سامارقاندتاعى جىبەك جولى ۋنيۆەرسيتەتىندە يۋنەسكو كافەدراسى اشىلدى.
بيىلعى جىلى وزبەكستان يۋنەسكو-نىڭ 43-ءشى باس كونفەرەنتسياسىن قابىلدايدى. بۇل ماڭىزدى جيىن ۇيىمنىڭ 80 جىلدىعىنا وراي العاش رەت پاريجدەن تىس جەردە – سامارقاندا وتپەك.
يۋنەسكو-نىڭ ارنايى تىزىمىنە تۇران شولدەرى، زارافشان-قاراقۇم ءدالىزى، جىبەك شارۋاشىلىعى ونەرى، كەراميكا، رۋبابتا ويناۋ ءداستۇرى، يفتار ءراسىمى جانە "بۇحارا ءامىرىنىڭ كەڭسە مۇراعاتى" سىندى مادەني مۇرالار ەنگىزىلدى.
كەزدەسۋ بارىسىندا تاراپتار پراكتيكالىق ىنتىماقتاستىقتى كەڭەيتۋ، مادەني جانە ءبىلىم بەرۋ جوبالارىن دامىتۋ جونىندە ۋاعدالاستىققا قول جەتكىزدى.
