حالىق ساناعى ارقىلى الاياقتار ازاماتتاردىڭ اتىنا نەسيە تاعايىنداۋدا، دەپ حابارلايدى “ادىرنا” ۇلتتىق پورتالى قاراعاندى وبلىسىنىڭ پوليتسيا دەپارتامەنتى قىزمەتىنە سىلتەمە جاساپ.
WhatsApp مەسسەندجەرىندە جىبەرىلگەن داۋىستى حابارلاما قازاقستاندىقتاردى الاڭداتتى. وندا حالىق ساناعى ارقىلى الاياقتىقتىڭ جاڭا ءتۇرى پايدا بولعانى ايتىلعان.
"بەينەقوڭىراۋدا بەيتانىس ءنومىر شىرىلدايدى. ءسىز تەلەفوندى الاسىز. ءسىزدىڭ بەتىڭىز سكانەرلەنەدى، ولار بىرنەشە سۇراقتار قويادى، سودان كەيىن ادامدارعا نەسيە بەرىلەدى. قازىردىڭ وزىندە بىرنەشە جاعداي تىركەلگەن. شاحان، اقتاس، قاراعاندى قالالارىندا ءۇش جاعداي. قاراعاندىدا ءبىر اجەنىڭ اتىنان 11 ميلليون تەڭگە نەسيە راسىمدەلگەن. سونىمەن قاتار قاراعاندىدا ەر ادامنىڭ اتىنان دا بىرنەشە نەسيە الىپ تاستاعان. ەر ادام وسى جاعدايدان كەيىن وزىنە-ءوزى قول سالدى", – دەلىنگەن اقپاراتا.
وبلىستىق پوليتسيا دەپارتامەنتىنىڭ ءباسپاسوز قىزمەتى اۋديو تاراتۋدا كورسەتىلگەن فاكتىلەر شىندىققا سايكەس كەلمەيتىنىن حابارلادى.
"قازىرگى ۋاقىتتا پوليتسيا تاراتىلعان حابارلامانىڭ اۆتورىنىڭ جەكە باسىن انىقتاۋعا تىرىسۋدا. قىلمىستىق كودەكستىڭ 274-بابىنا سايكەس، بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن قولدانا وتىرىپ، جالعان اقپارات تاراتۋ قىلمىستىق جاۋاپكەرشىلىككە اكەپ سوعادى", – دەدى ءباسپاسوز حاتشىسى باقىتجان قۇدياروۆ.
”ادىرنا” ۇلتتىق پورتالى
