10 ناۋرىزدا سيريانىڭ جاڭا بيلىگى سيريا دەموكراتيالىق كۇشتەرى مەن (SDF) كۇرد اۆتونوميالىق اكىمشىلىگىنىڭ ازاماتتىق جانە اسكەري مەكەمەلەرىن سيريا ۇكىمەتىنە بىرىكتىرۋ تۋرالى كەلىسىمگە كەلگەنىن جاريالادى. كەلىسىمدە سيريانىڭ سولتۇستىك-شىعىسىنداعى ناقتى وبەكتىلەر، سونىڭ ىشىندە شەكارالىق پوستتار، اۋەجاي جانە مۇناي مەن گاز كەن ورىندارى كورسەتىلگەن. كەلىسىم 2025 جىلدىڭ سوڭىنا دەيىن جۇزەگە اسىرىلۋى ءتيىس، دەپ حابارلايدى “ادىرنا” ۇلتتىق پورتالى AFP اگەنتتىگىنە سىلتەپ.
2024 جىلى جەلتوقساندا باشار اساد رەجيمى قۇلاتىلعاننان كەيىن احمەد اش-شاراا باستاعان سيريانىڭ جاڭا بيلىگى سيريادا ارەكەت ەتەتىن قارۋلى توپتاردى تاراتىپ، ەلدىڭ بۇكىل اۋماعىندا باقىلاۋ ورناتۋعا تىرىسۋدا.
SDF-پەن كەلىسىمگە قول قويۋ سيريانىڭ باتىسىنداعى جاعالاۋ ايماعىندا ورىن العان قارۋلى قاقتىعىستار مەن جاپپاي سوتسىز جازالاۋلار كەزىندە ورىن الدى. بۇل ايماقتا نەگىزىنەن سيريانىڭ بيلىكتەن قۋىلعان ديكتاتورى اساد كىرەتىن قاۋىمداستىقتىڭ وكىلدەرى تۇرادى.
قۇقىق قورعاۋشىلاردىڭ ايتۋىنشا، سيريانىڭ جاعالاۋداعى لاتاكيا جانە تارتۋس پروۆينتسيالارىنىڭ قالالارىندا، اۋىلدارىندا جانە تاۋلارىندا «قاۋىپسىزدىكتى قالپىنا كەلتىرۋ» وپەراتسياسىنىڭ ءتورت كۇنىندە «اساد جاساقتارىنىڭ قالدىقتارى مەن ولاردى قولدايتىندارعا قارسى باعىتتالعان» 1500-گە جۋىق ادام قازا تاپتى، ولاردىڭ كوپشىلىگى بەيبىت تۇرعىندار.
سيريا پرەزيدەنتىنىڭ مىندەتىن اتقارۋشى احمەد اش-شاراا وپەراتسيانىڭ اياقتالۋىنا تۇسىنىكتەمە بەرە وتىرىپ، اسادتى قولدايتىن توپتاردى سوعىس قيمىلدارىنىڭ باستاماشىسى دەپ اتادى، سونىمەن بىرگە ولاردىڭ اراسىندا ونىڭ جاقتاستارى بولسا دا، بەيبىت تۇرعىنداردى قىرىپ-جويۋعا جاۋاپتىلاردى جازالاۋعا ۋادە بەردى.
