قازاقتىڭ تۇڭعىش بارد ءانشىسى، اقىن، سازگەر تابىلدى دوسىموۆتىڭ كوزى تىرىسىندە پايدالانعان «ۆولگا» كولىگى رەستاۆراتسيادان وتكىزىلەدى، دەپ حابارلايدى “ادىرنا” ۇلتتىق پورتالى قپزاقپاراتقا سىلتەپ.
اتىراۋ وبلىسى اكىمىنىڭ ورىنباسارى دارىن شامۇراتوۆتىڭ ايتۋىنشا، اقىن ءارى كومپوزيتوردىڭ شىعارماشىلىعىن دارىپتەۋ، جاس ۇرپاققا كەڭىنەن ناسيحاتتاۋ كوزدەلىپ وتىر.
“بيىل قازاقتىڭ تۇڭعىش بارد-اقىنى تابىلدى دوسىموۆتىڭ تۋعانىنا 60 جىل تولادى. وسىعان وراي وبلىس اكىمى سەرىك شاپكەنوۆتىڭ تاپسىرماسىمەن اقىن مىنگەن «ۆولگا» اۆتوكولىگى رەستاۆراتسيادان وتەتىن بولادى. بۇل يگى ءىستى وبلىس اكىمىنىڭ ورىنباسارى قايرات نۇرتاەۆپەن بىرگە جۇزەگە اسىرامىز”، - دەيدى دارىن شامۇراتوۆ.
تابىلدى دوسىموۆ — يندەر اۋدانىنىڭ تۋماسى. ول ال-فارابي اتىنداعى قازمۋ-ءدىڭ جۋرناليستيكا فاكۋلتەتىن بىتىرگەنىمەن، قازاقتىڭ تالانتتى اقىندارى مۇقاعالي ماقاتاەۆ، فاريزا وڭعارسىنوۆا، ەسەنعالي راۋشانوۆ، سۆەتقالي نۇرجانوۆتىڭ ولەڭدەرىنە بىرنەشە ءان جازعان. ءسوزىن دە، ءانىن دە وزى جازىپ، گيتارامەن ورىنداعان ءتول شىعارمالارى كوپ.
قازىر تانىمال كومپوزيتوردىڭ «ۇناتامىن مەن سەنى»، «بيىكتىك»، «سايگۇلىك» اندەرى ءجيى ورىندالادى. «اتىڭدى سەنىڭ ايتامىن ءان قىلىپ نەگە؟»، «قوزىم-اۋ» دەشى كۇلىمدەپ بايانداي ماعان، تىرلىكتى مىناۋ، جانىم-اي، ماڭگىلىك دەمە، ۇيىقتاپ كەتسەم ءبىر كۇنى، ويانباي قالام…» دەگەن اندەرى بار.
ەسكە سالا كەتەلىك، بۇدان بۇرىن اتىراۋدا العىس ايتۋ كۇنىندە وزگە ەتنوستىڭ بالاسى «ەركە سىلقىم» كۇيىن تارتىپ بەرگەنىن جازعان ەدىك.
