سولتۇستىككە قازاقتاردى قونىستاندىرۋ ماسەلەسىن كوتەرىپ جۇرگەن «تاۋەكەل» ۇيىمىنىڭ جەتەكشىسى بۋراحان داقانوۆ سقو-عا جاڭا جۇمىس ورىندارىن اشۋ تۋرالى ۇسىنىس تاستادى، دەپ حابارلايدى «ادىرنا» ءتىلشىسى.
ايتۋىنشا، وڭتۇستىكتەن سولتۇستىككە قونىس اۋدارۋ كوشى باياۋ ءجۇرىپ جاتىر.
«رەسمي اقپارات بويىنشا 2023-2024 جىلدارى سولتۇستىككە جالپى 5 245 ادام نەمەسە 1 636 وتباسى قونىس اۋدارعان. ونىڭ ىشىندە 445 قانداس اعايىن بار. ناقتى ايتسام، 2023 جىلى – 2 698 ادام (821 وتباسى), 2024 جىلى – 2 547 ادام (815 وتباسى) كوشكەن. ياعني، ەكى جىل ىشىندە مەملەكەتتەن كوش ماسەلەسىنە بولىنگەن "اتاۋلى" سۋبسيديانى العان ادام سانى — 5245. ولاردىڭ اراسىندا ەڭبەككە جارامدى 2 271 ادام، 18 جاسقا تولماعان 2 512 بالا، 162 زەينەتكەر، 103 ستۋدەنت جانە بالا كۇتىمى بويىنشا دەكرەتتىك دەمالىستا وتىرعان 197 ايەل بار.
ايتا كەتۋ كەرەك، كەيبىر جەكە باستىق، وتباسىلىق، كليماتتىق، ەكونوميكالىق سەبەپتەرمەن كەرى قايتىپ جاتقاندارى دا بار. ولاردىڭ جالپى سانى 560 ادامنان اسادى. ياعني ورتا ەسەپپەن 10 پايىزدى قۇرايدى. سولتۇستىككە قونىس اۋدارىپ جاتقان ازاماتتاردىڭ شامامەن 87-92 پايىزى — قازاق. ال قازاقستان ازاماتى، بىراق ۇلتى وزبەك اعايىننىڭ سولتۇستىككە كوشكەن ۇلەسى كەمىندە 7 پايىزدى قۇراپ وتىر. وزدەرىڭىز بايقاپ وتىرعانداي، سوڭعى ەكى جىلدا سولتۇستىككە كوشۋ باعدارلاماسى بەلسەندى ءجۇرىپ جاتىر. بىراق جىلىنا 2500 ادام دەگەن وتە- وتە از. بۇل تەممپەن 10 جىلدا 25 مىڭ ادامعا ارەز جەتەمىز. ال تابيعي جولمەن وبلىستان كەتىپ جاتقان ادامداردىڭ سانى وسىمەن شامالاس»،—دەدى ول.
بەلسەندى الەۋمەتتىك جەلىدەگى پاراقشاسىندا ماسەلەنى شەشۋ جولىن ۇسىندى.
«ۇكىمەتتەن بەرىلەتىن كۆوتا سانىن كەمىندە 5 مىڭعا كوتەرۋدى، ونداعى كومەك ۇلەسىن بارىنشا ارتتىرۋدى، سولتۇستىككە جاڭا جۇمىس ورىندارىن اشىپ، جاڭا ۇيلەر سالۋدى ۇسىنامىن. قىسقاسى، كوشى-قوننىڭ تۇراقتىلىعىن ارتتىرۋ ءۇشىن قوسىمشا قولداۋ شارالارى قاجەت.
باستى ماسەلەلەردىڭ ءبىرى – كوشىپ كەلگەن ازاماتتاردىڭ تۇراقتاپ قالۋىن قامتاماسىز ەتۋ. بۇل ءۇشىن تۇرعىن ءۇي جاعدايىن جاقسارتۋ، جاڭا جۇمىس ورىندارىن اشۋ، الەۋمەتتىك ينفراقۇرىلىمدى دامىتۋ، بەيىمدەۋ ورتالىقتارىن قۇرۋ جانە كوشى-قون پروتسەسىنىڭ اقپاراتتىق قامتۋىن ارتتىرۋ قاجەت دەپ ەسەپتەيمىن»،—دەپ تولىقتىردى بۋراحان داقانوۆ.
ايتا كەتەيىك، قازاقستان ۇكىمەتى 2017 جىلى سولتۇستىكتەگى وبلىستارعا وڭتۇستىك ايماقتاردا تۇراتىن ادامداردى جانە شەتتەن كەلگەن قانداستاردى كوشىرۋ جوباسىن باستاعان بولاتىن.
