Soltüstıkke qazaqtardy qonystandyru mäselesın köterıp jürgen «Täuekel» ūiymynyŋ jetekşısı Burahan Daqanov SQO-ǧa jaŋa jūmys oryndaryn aşu turaly ūsynys tastady, dep habarlaidy «Adyrna» tılşısı.
Aituynşa, oŋtüstıkten soltüstıkke qonys audaru köşı baiau jürıp jatyr.
«Resmi aqparat boiynşa 2023-2024 jyldary soltüstıkke jalpy 5 245 adam nemese 1 636 otbasy qonys audarǧan. Onyŋ ışınde 445 qandas aǧaiyn bar. Naqty aitsam, 2023 jyly – 2 698 adam (821 otbasy), 2024 jyly – 2 547 adam (815 otbasy) köşken. Iаǧni, ekı jyl ışınde memleketten köş mäselesıne bölıngen "atauly" subsidiiany alǧan adam sany — 5245. Olardyŋ arasynda eŋbekke jaramdy 2 271 adam, 18 jasqa tolmaǧan 2 512 bala, 162 zeinetker, 103 student jäne bala kütımı boiynşa dekrettık demalysta otyrǧan 197 äiel bar.
Aita ketu kerek, keibır jeke bastyq, otbasylyq, klimattyq, ekonomikalyq sebeptermen kerı qaityp jatqandary da bar. Olardyŋ jalpy sany 560 adamnan asady. Iаǧni orta eseppen 10 paiyzdy qūraidy. Soltüstıkke qonys audaryp jatqan azamattardyŋ şamamen 87-92 paiyzy — qazaq. Al Qazaqstan azamaty, bıraq ūlty özbek aǧaiynnyŋ soltüstıkke köşken ülesı kemınde 7 paiyzdy qūrap otyr. Özderıŋız baiqap otyrǧandai, soŋǧy ekı jylda soltüstıkke köşu baǧdarlamasy belsendı jürıp jatyr. Bıraq jylyna 2500 adam degen öte- öte az. Būl temmpen 10 jylda 25 myŋ adamǧa ärez jetemız. Al tabiǧi jolmen oblystan ketıp jatqan adamdardyŋ sany osymen şamalas»,—dedı ol.
Belsendı äleumettık jelıdegı paraqşasynda mäselenı şeşu jolyn ūsyndy.
«Ükımetten berıletın kvota sanyn kemınde 5 myŋǧa köterudı, ondaǧy kömek ülesın barynşa arttyrudy, soltüstıkke jaŋa jūmys oryndaryn aşyp, jaŋa üiler saludy ūsynamyn. Qysqasy, köşı-qonnyŋ tūraqtylyǧyn arttyru üşın qosymşa qoldau şaralary qajet.
Basty mäselelerdıŋ bırı – köşıp kelgen azamattardyŋ tūraqtap qaluyn qamtamasyz etu. Būl üşın tūrǧyn üi jaǧdaiyn jaqsartu, jaŋa jūmys oryndaryn aşu, äleumettık infraqūrylymdy damytu, beiımdeu ortalyqtaryn qūru jäne köşı-qon prosesınıŋ aqparattyq qamtuyn arttyru qajet dep esepteimın»,—dep tolyqtyrdy Burahan Daqanov.
Aita keteiık, Qazaqstan ükımetı 2017 jyly soltüstıktegı oblystarǧa oŋtüstık aimaqtarda tūratyn adamdardy jäne şetten kelgen qandastardy köşıru jobasyn bastaǧan bolatyn.
