Soltústikke qazaqtardy qonystandyrý máselesin kóterip júrgen «Táýekel» uıymynyń jetekshisi Býrahan Daqanov SQO-ǵa jańa jumys oryndaryn ashý týraly usynys tastady, dep habarlaıdy «Adyrna» tilshisi.
Aıtýynsha, ońtústikten soltústikke qonys aýdarý kóshi baıaý júrip jatyr.
«Resmı aqparat boıynsha 2023-2024 jyldary soltústikke jalpy 5 245 adam nemese 1 636 otbasy qonys aýdarǵan. Onyń ishinde 445 qandas aǵaıyn bar. Naqty aıtsam, 2023 jyly – 2 698 adam (821 otbasy), 2024 jyly – 2 547 adam (815 otbasy) kóshken. Iaǵnı, eki jyl ishinde memleketten kósh máselesine bólingen "ataýly" sýbsıdııany alǵan adam sany — 5245. Olardyń arasynda eńbekke jaramdy 2 271 adam, 18 jasqa tolmaǵan 2 512 bala, 162 zeınetker, 103 stýdent jáne bala kútimi boıynsha dekrettik demalysta otyrǵan 197 áıel bar.
Aıta ketý kerek, keıbir jeke bastyq, otbasylyq, klımattyq, ekonomıkalyq sebeptermen keri qaıtyp jatqandary da bar. Olardyń jalpy sany 560 adamnan asady. Iaǵnı orta eseppen 10 paıyzdy quraıdy. Soltústikke qonys aýdaryp jatqan azamattardyń shamamen 87-92 paıyzy — qazaq. Al Qazaqstan azamaty, biraq ulty ózbek aǵaıynnyń soltústikke kóshken úlesi keminde 7 paıyzdy qurap otyr. Ózderińiz baıqap otyrǵandaı, sońǵy eki jylda soltústikke kóshý baǵdarlamasy belsendi júrip jatyr. Biraq jylyna 2500 adam degen óte- óte az. Bul temmpen 10 jylda 25 myń adamǵa árez jetemiz. Al tabıǵı jolmen oblystan ketip jatqan adamdardyń sany osymen shamalas»,—dedi ol.
Belsendi áleýmettik jelidegi paraqshasynda máseleni sheshý jolyn usyndy.
«Úkimetten beriletin kvota sanyn keminde 5 myńǵa kóterýdi, ondaǵy kómek úlesin barynsha arttyrýdy, soltústikke jańa jumys oryndaryn ashyp, jańa úıler salýdy usynamyn. Qysqasy, kóshi-qonnyń turaqtylyǵyn arttyrý úshin qosymsha qoldaý sharalary qajet.
Basty máselelerdiń biri – kóship kelgen azamattardyń turaqtap qalýyn qamtamasyz etý. Bul úshin turǵyn úı jaǵdaıyn jaqsartý, jańa jumys oryndaryn ashý, áleýmettik ınfraqurylymdy damytý, beıimdeý ortalyqtaryn qurý jáne kóshi-qon proesiniń aqparattyq qamtýyn arttyrý qajet dep esepteımin»,—dep tolyqtyrdy Býrahan Daqanov.
Aıta keteıik, Qazaqstan úkimeti 2017 jyly soltústiktegi oblystarǵa ońtústik aımaqtarda turatyn adamdardy jáne shetten kelgen qandastardy kóshirý jobasyn bastaǵan bolatyn.
