سەنبى كۇنى يران بيلىگى اقش تاراپىنان بىرقاتار ەلدەردىڭ ازاماتتارىنا، ونىڭ ىشىندە يراندىقتارعا قاتىستى ەنگىزىلگەن جاڭا كىرۋ تىيىمىن قاتاڭ سىنعا الدى. بۇل تۋرالى يراننىڭ مەملەكەتتىك اقپارات اگەنتتىگى IRNA جازدى، دەپ حابارلايدى “ادىرنا”..
يراننىڭ سىرتقى ىستەر مينيسترلىگى مالىمدەمە تاراتىپ، ۆاشينگتوننىڭ بۇل شەشىمىن "يران حالقىنا باعىتتالعان تەرەڭ تامىر جايعان وشپەندىلىكتىڭ ايقىن بەلگىسى" دەپ اتادى. مينيسترلىكتىڭ پىكىرىنشە، بۇل تىيىم تەك ۇلتى مەن دىنىنە بايلانىستى ادامدارعا قارسى باعىتتالعان جانە حالىقارالىق قۇقىقتىڭ نەگىزگى قاعيداتتارىنا قايشى كەلەدى.
«اقش اكىمشىلىگىنىڭ بۇل شەشىمى كەمسىتۋشىلىك كوزقاراستى بىلدىرەدى جانە حالىقارالىق قۇقىق نورمالارىن، سونىڭ ىشىندە كەمسىتپەۋ مەن ادام قۇقىقتارىن قۇرمەتتەۋ قاعيدالارىن ورەسكەل بۇزادى»، – دەلىنگەن مينيسترلىكتىڭ رەسمي مالىمدەمەسىندە.
يران تاراپى بۇۇ مەن حالىقارالىق ادام قۇقىقتارىن قورعاۋ ۇيىمدارىن ۆاشينگتوننىڭ «بىرجاقتى ءارى كەمسىتۋشىلىك سيپاتتاعى» شارالارىنا قارسى اشىق مالىمدەمە جاساۋعا شاقىردى.
سونىمەن قاتار، يران ءوز ازاماتتارىنىڭ قۇقىقتارى مەن مۇددەلەرىن قورعاۋ ءۇشىن بارلىق قولجەتىمدى ديپلوماتيالىق جانە قۇقىقتىق تەتىكتەردى قولداناتىنىن مالىمدەدى.
ەسكە سالا كەتسەك، اقش اكىمشىلىگى بىرنەشە ەلدىڭ ازاماتتارىنا، سونىڭ ىشىندە يران تۇرعىندارىنا ەل اۋماعىنا كىرۋگە قاتىستى قوسىمشا شەكتەۋلەر ەنگىزگەن بولاتىن. بۇل شەشىم حالىقارالىق قاۋىمداستىق تاراپىنان الاڭداۋشىلىق تۋدىرىپ وتىر.
