دونالد ترامپ ۋكرايناداعى قاقتىعىس، رەسەي جانە يرانمەن كەلىسسوزدەر تۋرالى مالىمدەمە جاسادى، دەپ حابارلايدى "ادىرنا" ۇلتتىق پورتالى.
اقش-تىڭ پرەزيدەنتى دونالد ترامپ اق ۇيدە وتكەن بريفينگتە ۋكرايناداعى قاقتىعىس پەن اقش-تىڭ سىرتقى ساياساتىنا قاتىستى بىرقاتار ماڭىزدى مالىمدەمە جاسادى.
ترامپ رەسەي پرەزيدەنتى ۆلاديمير ءپۋتيننىڭ شىن مانىندە بەيبىتشىلىككە ۇمتىلاتىنىنا سەنىم ءبىلدىردى.
«مەن وعان سەنەمىن (رەد. پۋتينگە). ءدال قازىر ولار ۋكراينانى اياۋسىز بومبالاپ جاتىر. بىراق شىن ايتسام، ۋكراينامەن مامىلە جاساۋ الدەقايدا قيىن»، – دەدى ترامپ.
سونداي-اق، ول اقش-تىڭ ۋكرايناعا اسكەري كومەگىن جالعاستىرۋى كيەۆتىڭ بەيبىت كەلىسسوزدەرگە دايىندىعىنا بايلانىستى بولاتىنىن ايتتى.
«ەگەر ولار كەلىسسوز جۇرگىزۋگە دايىن بولماسا – ءبىز كەتەمىز. ويتكەنى ءبىز ءۇشىن باستىسى – قاقتىعىستى رەتتەۋ»، – دەدى ترامپ.
ونىڭ پىكىرىنشە، اقش ۋكرايناعا ميللياردتاعان دوللار قارجى ءبولىپ كەلەدى، بىراق ەۋروپا ەلدەرى سوعىستى قالاي اياقتاۋ كەرەكتىگىن بىلمەيدى جانە قاقتىعىستىڭ تەز شەشىلۋىنە مۇددەلى ەمەس.
بريفينگ بارىسىندا ترامپ يراننىڭ جوعارعى جەتەكشىسى اياتوللا الي حامەنەيگە جاڭا يادرولىق كەلىسىم جاساۋ تۋرالى ۇسىنىس جازىلعان حات جىبەرگەنىن مالىمدەدى.
«مەن ولارعا: "كەلىسسوزدەر جۇرگىزۋگە دايىن بولساڭىزدار جاقسى، ويتكەنى ەگەر سوعىس باستالسا، بۇل وتە جامان بولادى" دەپ جازدىم»، – دەدى ترامپ.
ونىڭ ايتۋىنشا، جاڭا كەلىسىم يران ءۇشىن سوعىسقا بارۋدان الدەقايدا ءتيىمدى بولار ەدى. الايدا، يران بيلىگى ازىرگە بۇل حاتقا جاۋاپ بەرگەن جوق.
ترامپ كانادادان اكەلىنەتىن ءسۇت ونىمدەرى مەن اعاشقا اينا شارا رەتىندە كەدەندىك سالىقتار ەنگىزىلەتىنىن حابارلادى.
«ءبىز مۇنى بۇگىن دە ىستەي الامىز، بىراق دۇيسەنبى نەمەسە سەيسەنبىگە دەيىن كۇتۋىمىز مۇمكىن»، – دەدى ترامپ.
اقش-تىڭ بۇرىنعى پرەزيدەنتى جاساعان بۇل مالىمدەمەلەر حالىقارالىق ساياساتتا ۇلكەن وزگەرىستەردىڭ ورىن الۋ مۇمكىندىگىن كورسەتىپ وتىر.
