Donald Tramp Ýkraınadaǵy qaqtyǵys, Reseı jáne Iranmen kelissózder týraly málimdeme jasady, dep habarlaıdy "Adyrna" ulttyq portaly.
AQSh-tyń prezıdenti Donald Tramp Aq úıde ótken brıfıngte Ýkraınadaǵy qaqtyǵys pen AQSh-tyń syrtqy saıasatyna qatysty birqatar mańyzdy málimdeme jasady.
Tramp Reseı prezıdenti Vladımır Pýtınniń shyn máninde beıbitshilikke umtylatynyna senim bildirdi.
«Men oǵan senemin (red. Pýtınge). Dál qazir olar Ýkraınany aıaýsyz bombalap jatyr. Biraq shyn aıtsam, Ýkraınamen mámile jasaý áldeqaıda qıyn», – dedi Tramp.
Sondaı-aq, ol AQSh-tyń Ýkraınaǵa áskerı kómegin jalǵastyrýy Kıevtiń beıbit kelissózderge daıyndyǵyna baılanysty bolatynyn aıtty.
«Eger olar kelissóz júrgizýge daıyn bolmasa – biz ketemiz. Óıtkeni biz úshin bastysy – qaqtyǵysty retteý», – dedi Tramp.
Onyń pikirinshe, AQSh Ýkraınaǵa mıllıardtaǵan dollar qarjy bólip keledi, biraq Eýropa elderi soǵysty qalaı aıaqtaý kerektigin bilmeıdi jáne qaqtyǵystyń tez sheshilýine múddeli emes.
Brıfıng barysynda Tramp Irannyń joǵarǵy jetekshisi aıatolla Alı Hameneıge jańa ıadrolyq kelisim jasaý týraly usynys jazylǵan hat jibergenin málimdedi.
«Men olarǵa: "Kelissózder júrgizýge daıyn bolsańyzdar jaqsy, óıtkeni eger soǵys bastalsa, bul óte jaman bolady" dep jazdym», – dedi Tramp.
Onyń aıtýynsha, jańa kelisim Iran úshin soǵysqa barýdan áldeqaıda tıimdi bolar edi. Alaıda, Iran bıligi ázirge bul hatqa jaýap bergen joq.
Tramp Kanadadan ákelinetin sút ónimderi men aǵashqa aına shara retinde kedendik salyqtar engiziletinin habarlady.
«Biz muny búgin de isteı alamyz, biraq dúısenbi nemese seısenbige deıin kútýimiz múmkin», – dedi Tramp.
AQSh-tyń burynǵy prezıdenti jasaǵan bul málimdemeler halyqaralyq saıasatta úlken ózgeristerdiń oryn alý múmkindigin kórsetip otyr.
