سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بيىل ەلىمىز ەڭ نەگىزگى ءتورت ترانسشەكارالىق وزەن ارقىلى كورشى ەلدەردەن قانشا سۋ الاتىنىن ايتتى. بۇل تۋرالى ول ۆەدومستۆونىڭ القا ماجىلىسىنەن كەيىن باق وكىلدەرىنىڭ سۇراعىنا بەرگەن جاۋابىندا مالىمدەدى، دەپ حابارلايدى “ادىرنا” ۇلتتىق پورتالى.
“سىرداريا وزەنى بويىنشا دۋشانبە قالاسىندا (تاجىكستان) قاراشا ايىندا بۇكىل تاراپ كەزدەستىك. بۇل وزەننىڭ سۋىن ءبولىسۋ ەكى كەزەڭگە بولىنەدى. مىسالى، بىلتىر ۆەگەتاتسيالىق كەزەڭدە جوسپارلانعان ۇلەستى 100 پايىز الدىق. ول 5 تەكشە شاقىرىمعا جۋىق. بيىل ۆەگەتاتسيا ارالىق كەزەڭدە 10,9 تەكشە شاقىرىم (10,9 ملرد تەكشە مەتر – رەد) سۋ الامىز دەپ كەلىسكەنبىز. ال ۆەگەتاتسيا كەزەڭىندە قانشا الاتىنىمىزدى ءساۋىر ايىندا تاشكەنت قالاسىندا (وزبەكستان) قايتا كەلىسەمىز. بىزگە قانشا تيەتىنى سول كەزدە بەلگىلى بولادى.
جايىق وزەنى بويىنشا بىلتىر وتە كوپ سۋ كەلگەنىن بىلەسىزدەر، شامامەن 17 تەكشە شاقىرىمنان استام سۋ الدىق. قالىپتى جىلدارى 8-9 تەكشە شاقىرىم سۋ كەلەتىن. بيىلعا جاسالعان كەلىسسوز بويىنشا 18 تەكشە شاقىرىم سۋ ءبولۋ كەرەك. سوندا بيىل دا قالىپتى جىلدارعا قاراعاندا 2 ەسەدەن استام كوپ سۋ بولادى”، - دەدى مينيستر.
سونداي-اق، ول باستاۋىن قىتايدان الىپ جاتقان ەرتىس وزەنىنىڭ 70 پايىز سۋى قازاقستاندا قالىپتاساتىنىن ەسكە سالدى.
“بىلتىر سۋ مول بولعاندىقتان، بۇقتىرما سۋ قويماسىن شامامەن 100 پايىز تولتىرىپ الدىق. ال قىتايدان كىرەتىن سۋدىڭ كولەمى 15-16 تەكشە شاقىرىم بولۋ كەرەك. وزىمىزگە تيەسىلى سۋدى 100 پايىز الىپ وتىرمىز دەۋگە بولادى.
ىلە وزەنى بويىنشا بىلتىر تەك بالقاش كولىنە عانا 16 تەكشە شاقىرىمعا جۋىق سۋ الدىق. جىلدا 11-12 تەكشە شاقىرىم الاتىنبىز. بيىل دا 16 تەكشە شاقىرىم كولەمىندە بولادى دەپ جوسپارلاپ وتىرمىز. كەلەسى اپتادا ورىنباسارىم قىتاي حالىق رەسپۋبليكاسىنا بارىپ، ارنايى مەموراندۋمعا قول قويادى. ول قۇجات ىلە ماسەلەسىن عانا ەمەس، ەكى ەلدىڭ سۋ قاتىناستارى سالاسىنداعى ماسەلەلەردى قامتيدى”، - دەدى نۇرجان نۇرجىگىتوۆ.
