قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ شىعىس قازاقستان وبلىسى مەن اباي وبلىسىنا جۇمىس ساپارىمەن بارىپ، گيدروتەحنيكالىق قۇرىلىستاردىڭ جاي-كۇيىمەن تانىستى.
جۇمىس ساپارىنىڭ ءبىرىنشى كۇنى مينيستر «قازسۋشار» رمك شىعىس قازاقستان فيليالىنىڭ باسشىلىعىمەن كەزدەسۋ وتكىزدى، وعان جەرگىلىكتى وبلىس اكىمدىگىنىڭ وكىلدەرى دە قاتىستى. باياندامالاردى تىڭداعان سوڭ نۇرجان نۇرجىگىتوۆ مينيسترلىكتىڭ جۇرگىزىپ جاتقان جۇمىسى تۋرالى ايتىپ بەردى. مىسالى، جەرگىلىكتى باسسەيندىك ينسپەكتسيا شتابى 20 ادامعا ارتتى. بۇل وڭىردەگى سۋ وبەكتىلەرىن باقىلاۋدى كۇشەيتۋگە مۇمكىندىك بەرەدى.
سونىمەن قاتار، مينيستر تارباعاتاي اۋدانىنداعى «قاندىسۋ» سۋ قويماسى مەن زايسان اۋدانىنداعى «ۇيدەنە» سۋ قويماسىن جوندەۋدى باستاۋ بويىنشا جۇمىستى جەدەلدەتۋدى، سونداي-اق ەكى اۋدانداعى يرريگاتسيالىق جۇيەلەردى جاڭعىرتۋدى تاپسىردى. وتكەن جىلى «قاندىسۋ» سۋ قويماسىندا وبەكتىنىڭ تەحنيكالىق جاي-كۇيىنە كوپ فاكتورلى تەكسەرۋ جۇرگىزىلدى، ال وتكەن اپتادا «ۇيدەنە» سۋ قويماسىندا وسىنداي كوپ فاكتورلى تەكسەرۋ جۇرگىزۋگە شارت جاسالدى، ودان كەيىن جوبالاۋ-سمەتالىق قۇجاتتاما جاسالادى.
سونداي-اق، نۇرجان نۇرجىگىتوۆ كولىك، ەكولوگيا جانە اۋىل شارۋاشىلىعى مينيسترلىكتەرىمەن بىرلەسىپ سۋ قويمالارىنان ەرتىس وزەنىنە كەمە قاتىناسى ءۇشىن سۋ جىبەرۋدى رەتتەۋ جانە رەتكە كەلتىرۋ قاجەتتىگىن اتاپ ءوتتى. سونىمەن قاتار، مينيستر ارىپتەستەرىمەن «قازسۋشار» رمك-نىڭ اباي وبلىسىنداعى فيليالىن اشۋ مۇمكىندىگىن تالقىلادى.
كەلەسى كۇنى مينيستر شقو سامار اۋدانىنداعى لايلى سۋ قويماسىنىڭ بوگەتىنە باردى. نىسان كۇردەلى جوندەۋدى قاجەت ەتەدى. نۇرجان نۇرجىگىتوۆ جەرگىلىكتى تۇرعىنداردىڭ قاۋىپسىزدىگىن قامتاماسىز ەتۋ ءۇشىن نىساندى رەكونسترۋكتسيالاپ قانا قويماي، ونى جاقىن ماڭداعى ەلدى مەكەندەردى ىقتيمال سۋ تاسقىنى تۋرالى ەسكەرتەتىن دابىل جۇيەسىمەن جابدىقتاۋ قاجەتتىگىن اتاپ ءوتتى.
ءارى قاراي مينيستر نىساننىڭ جاي-كۇيىن جەكە باعالاۋ ءۇشىن «قاندىسۋ» سۋ قويماسىنا بارىپ، ونى جوندەۋدى باستاۋ بويىنشا جۇمىستى جەدەلدەتۋ قاجەتتىگىن تاعى دا ەسكە سالدى. وسىدان كەيىن نۇرجان نۇرجىگىتوۆ 2016 جىلى سۋ دەڭگەيىن كوتەرۋ ماقساتىندا قۇرىلىسى باستالعان، بىراق جوبالاۋداعى قاتەلىكتەرگە بايلانىستى اياقتالماعان قارعىبا وزەنىندەگى تىرەك-رەتتەۋ قۇرىلىستارىن قاراپ شىقتى. قازىرگى ۋاقىتتا جوبالاۋ-سمەتالىق قۇجاتتاماعا تۇزەتۋ ەنگىزىلىپ جاتىر. مينيستر بۇل باعىتتاعى جۇمىستى جەدەلدەتۋدى تاپسىردى.
سونداي-اق، قارعىبا وزەنىنىڭ بويىندا 11 يەسىز كانال انىقتالدى، ونىڭ 5-ءى كوممۋنالدىق مەنشىككە بەرىلدى، ال ولاردى جوندەۋگە جوبالىق-سمەتالىق قۇجاتتاما ازىرلەنىپ جاتىر. مينيستر بارلىق قاجەتتى قۇجاتتار دايىن بولعاننان كەيىن ارنالاردى قايتا قۇرۋعا كومەكتەسۋگە دايىن ەكەنىن ءبىلدىردى.
جۇمىس ساپارىنىڭ سوڭعى كۇنى نۇرجان نۇرجىگىتوۆ اباي وبلىسىنىڭ ءۇرجار اۋدانىنداعى قۇرىلىسى اياقتالماعان «قاراقول» سۋ قويماسىنا باردى.
«سۋ قويماسى 63 شارۋا قوجالىعىن سۋمەن قامتاماسىز ەتۋگە جانە 6,5 مىڭ گەكتاردان استام اۋىلشارۋاشىلىق جەرلەرىن سۋارمالى سۋمەن قامتاماسىز ەتۋگە قاۋقارلى، سوندىقتان جوبانى ىسكە اسىرۋ ءوڭىر حالقى ءۇشىن وتە ماڭىزدى. جەرگىلىكتى تۇرعىنداردىڭ ايتۋىنشا، شەتەلدىك ينۆەستورلار سۋ قويماسىندا گيدروەلەكتروستانتسيا سالۋعا دايىن، الايدا بۇل ءۇشىن نەگىزگى مىندەت — «قاراقول» سۋ قويماسىنىڭ قۇرىلىسىن تولىق اياقتاۋعا كوڭىل ءبولۋ قاجەت، — دەدى قر سۋ رەسۋرستارى جانە يرريگاتسيا ءمينيسترى.
ءمينيستردىڭ جۇمىس ساپارىنىڭ سوڭعى نۇكتەسى چار سۋ قويماسى بولدى. نۇرجان نۇرجىگىتوۆ وندا جۇرگىزىلىپ جاتقان قالپىنا كەلتىرۋ جۇمىستارىنىڭ بارىسىمەن تانىستى.
«ادىرنا» ۇلتتىق پورتالى
