الەم قازاقستاننىڭ جاھاندىق قاۋىپسىزدىك پەن تۇراقتىلىقتى ساقتاۋداعى ءرولىن مويىندادى، دەپ حابارلايدى "ادىرنا" ۇلتتىق پورتالى.
بۇل تۋرالى قازبەك مايگەلدينوۆ Facebook پاراقشاسىندا جازدى.
"كۇنى كەشە بۇۇ باس اسسامبلەياسىنىڭ جيىنى وتكەن ەدى. سول باسقوسۋدا قازاقستاندا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بۇۇ-نىڭ ايماقتىق ورتالىعىن اشۋ تۋرالى شەشىم قابىلداندى.
بۇل قازاقستان ءۇشىن نەنى بىلدىرەدى؟ قانداي پايداسى بار؟
بىرىنشىدەن، بۇۇ قۇرامىنداعى مەكەمەنىڭ الماتىدا اشىلۋى قازاقستاننىڭ ساياسات ساحناسىنداعى ءرولىن، جالپى الەمدەگى شەشىم قابىلداۋعا ىقپالىن مىعىمداي تۇسەدى. ەلىمىزدىڭ ساياسي سالماعىن ارتتىرىپ، ساياسي باسىمدىق بەرەدى.
ەكىنشىدەن، الماتى جەنەۆا، نيۋ-يورك، نايروبي، ۆەنا سەكىلدى بۇۇ-نىڭ نەگىزگى ورتالىقتارى ورنالاسقان قالالار قاتارىنا قوسىلىپ وتىر. ناتيجەسىندە الماتى – بۇۇ جۇيەسىندە شەشىم قابىلداناتىن ورتالىقتىڭ ءبىرى سانالماق. بۇدان بىلاي ورتالىق ازيا، اۋعانستانعا قاتىستى جوسپارلار، شەشىمدەر تىكەلەي الماتى ارقىلى قابىلدانادى دەسەك قاتەلەسپەيمىز.
ۇشىنشىدەن، وڭىردە بۇۇ-نىڭ كەڭسەسىن اشۋعا لايىق باسقا ۇمىتكەر مەملەكەت جوق. ادەتتە، ونداعى رەسمي تۇلعالار ورتالىق اشار كەزدە مەملەكەتتىڭ تۇراقتىلىعى مەن قاۋىپسىزدىگىنە ەرەكشە ءمان بەرەدى. بۇل تۇرعىدان الىپ قاراعاندا، قازاقستاننان باسقا ەلدى تاپپايسىز. ەستەرىڭىزدە بولسا، اۋعانستان بيلىگىن تاليبان باسىپ العان كەزدە بۇۇ سونداعى ۇيلەستىرۋ ورتالىعىن جەدەل تۇردە الماتىعا اكەلگەن ەدى", - دەپ جازدى ول.
ايتا كەتەيىك، مۇنداي ورتالىق اشۋ يدەياسى قازاقستان پرەزيدەنتى قاسىم-جومارت توقاەۆ تاراپىنان بۇعان دەيىن دە كوتەرىلگەن بولاتىن. ويتكەنى اۋعانستانداعى تۇراقتىلىق – تەك ورتالىق ازيا ەلدەرى ءۇشىن عانا ەمەس، بۇكىل الەم ءۇشىن ماڭىزدى. ەگەر وڭىردە احۋال ۋشىعاتىن بولسا، بوسقىندار تولقىنى كۇشەيىپ، بۇل كورشى مەملەكەتتەرگە ايتارلىقتاي سالماق سالادى.
