قاراعاندى وبلىسىنىڭ بۇقار جىراۋ اۋدانىنداعى مەكتەپتەردىڭ بىرىندە وقۋشىدان تۋبەركۋلەز انىقتالدى. اتا-انالار مەكتەپتىڭ كارانتينگە جابىلماعانىنا الاڭداۋلى، دەپ حابارلايدى "ادىرنا" ۇلتتىق پورتالى.
اۋرۋ پروفيلاكتيكالىق تەكسەرىس كەزىندە بەلگىلى بولعان. وبلىستىق دەنساۋلىق ساقتاۋ باسقارماسىنىڭ مالىمەتىنشە، وقۋشى بۇعان دەيىن دە تۋبەركۋلەزبەن اۋىرىپ، ەمدەلگەن.
"الدىن الۋ تەكسەرىسى بارىسىندا بۇرىن ەسەپتە تۇرعان ناۋقاستا اۋرۋدىڭ قايتا اسقىنعانى انىقتالدى. بۇل جاعداي ءجاسوسپىرىمنىڭ جاس ەرەكشەلىكتەرىنە، گورمونالدى وزگەرىستەرگە جانە يممۋنيتەتتىڭ السىرەۋىنە بايلانىستى بولۋى مۇمكىن", — دەپ ءتۇسىندىردى ۆەدومستۆو وكىلدەرى.
مەكتەپ وقۋشىلارىنىڭ اتا-انالارى بالالارىنىڭ دا اۋرۋ جۇقتىرۋى مۇمكىن ەكەنىن ايتىپ، الاڭداۋشىلىق ءبىلدىردى. الايدا، دەنساۋلىق ساقتاۋ باسقارماسى بارلىق قاجەتتى دەزينفەكتسيالىق شارالار جاسالعانىن جانە وزگە وقۋشىلارعا قاۋىپ جوق ەكەنىن مالىمدەدى.
"قازىرگى ۋاقىتتا ناۋقاس ستاتسيوناردا ەم قابىلداپ جاتىر. مەكتەپتە قورىتىندى دەزينفەكتسيا جۇرگىزىلدى، بارلىق بايلانىستا بولعان ادامدار تەكسەرۋدەن ءوتتى. قوسىمشا جۇقتىرۋ دەرەكتەرى انىقتالعان جوق. اتا-انالارعا سانيتارلىق-گيگيەنالىق نورمالاردى ساقتاۋ بويىنشا ءتۇسىندىرۋ جۇمىستارى جۇرگىزىلدى. قاشىقتان وقىتۋ ەنگىزۋدىڭ قاجەتى جوق", — دەپ حابارلادى باسقارما.
