زايسان، كۇرشىم، تارباعاتاي جانە سامار اۋداندارىنىڭ تۇرعىندارى 5 ناۋرىزدان باستاپ جۇمىس كۇنىن ءبىر ساعات ەرتەرەك باستايدى، دەپ حابارلايدى "ادىرنا" ۇلتتىق پورتالى.
شىعىس قازاقستان وبلىسى تارباعاتاي اۋدانىنىڭ اكىمى دارحان جورگەكباەۆتىڭ ايتۋىنشا، جۇمىس ۋاقىتىن ءبىر ساعاتقا جىلجىتۋ يدەياسىن اۋداننىڭ بارلىق 28 اۋىلدىق ەلدى مەكەنىنىڭ تۇرعىندارى قولداعان.
زايسان اۋدانىندا 33 ەلدى مەكەن بار، وندا 35 مىڭنان استام ادام تۇرادى.
اۋدان اكىمى اەليتا احمەتسالىمقىزىنىڭ ايتۋىنشا، زايساندىقتار بۇل ۇسىنىستى قۋانا قابىلداعان.
"بۇل شەشىم قابىلدانباس بۇرىن، ءاربىر اۋىلدىق وكرۋگتە جينالىستار وتكىزدىك، حالىق بۇل يدەيانى قولدادى. ويتكەنى زايسان اۋدانى شىعىس قازاقستان وبلىسىنىڭ شىعىس شەكاراسىنا ەڭ جاقىن ورنالاسقان، سوندىقتان بىزدە كۇن ەرتە شىعادى، ياعني جارىق ۋاقىت تا ەرتەرەك باستالادى. سوندىقتان جۇمىس كۇنىنىڭ 08:00-دە باستالىپ، 17:30-دا اياقتالۋى حالىققا وتە ىڭعايلى – جۇمىستان كەيىن ءۇي شارۋاسىنا، بالالارعا جانە جاقىندارىنا كوبىرەك ۋاقىت قالادى", – دەدى اكىم.
ايتا كەتەيىك، زايسان اۋدانىندا سەگىز اۋىلدىق وكرۋگ جانە 33 ەلدى مەكەن بار. وندا 35 219 ادام تۇرادى.
5 قاڭتاردان باستاپ كاتونقاراعاي اۋدانىنىڭ 17 اۋىلىندا جۇمىس كۇنى 08:00-دە باستالىپ، 17:30-دا اياقتالاتىن جاڭا جۇمىس كەستەسىنە كوشكەن بولاتىن. ال 24 اقپاننان باستاپ مارقاكول جانە ۇلكەن نارىن اۋداندارىنىڭ تۇرعىندارى دا وسى كەستەگە وتكەن.
