بۇگىن، 4 ناۋرىزدا سەربيا پارلامەنتىندە وپپوزيتسيالىق پارتيالاردىڭ دەپۋتاتتارى پيروتەحنيكالىق زاتتاردى قولدانىپ، توبەلەس شىعاردى. ءماجىلىس ترانسلياتسياسى ءۇouTube-تە تىكەلەي كورسەتىلدى، دەپ حابارلايدى “ادىرنا” ۇلتتىق پورتالى.
توبەلەس شامامەن وتىرىس باستالعاننان ءبىر ساعاتتان كەيىن باستالدى. دەپۋتاتتار جوعارى ءبىلىم بەرۋدى قارجىلاندىرۋدى ارتتىرۋ تۋرالى زاڭ جوباسىنا داۋىس بەرۋى ءتيىس بولاتىن. الايدا وپپوزيتسيا ۇكىمەتتىڭ باسىم كوپشىلىگى باسقا دا كوپتەگەن شەشىمدەردى ءبىر ۋاقىتتا ماقۇلداۋدى جوسپارلاپ وتىرعانىن مالىمدەدى.
ولار بۇل ارەكەتتى زاڭسىز دەپ سانايدى. سەبەبى، الدىمەن پرەمەر-مينيستر ميلوش ۆۋچەۆيچ پەن ونىڭ ۇكىمەتىنىڭ وتستاۆكاسى تۋرالى ماسەلە شەشىلۋى كەرەك. ۆۋچەۆيچ بۇل تۋرالى 28 قاڭتاردا، جاپپاي نارازىلىقتاردىڭ ورتاسىندا مالىمدەگەن بولاتىن.
وپپوزيتسيالىق زاڭ شىعارۋشىلار مىنبەگە شىعىپ، ىسقىرىپ، «رەجيم قۇلايتىنداي سەربيا كوتەرىلدى!» دەگەن جازۋى جانە قاندى الاقاننىڭ بەينەسى بار پلاكاتتاردى كوتەرىپ، قارسىلاستارمەن توبەلەسە باستادى. پارلامەنت زالىندا ءتۇتىن بومبالارىن جاعىپ، جۇمىرتقا مەن سۋ بوتەلكەلەرىن لاقتىردى. ءدال وسى ۋاقىتتا وپپوزيتسيانىڭ جۇزدەگەن جاقتاستارى پارلامەنت عيماراتىنىڭ الدىنا نارازىلىق شەرۋىنە جينالدى.
سەربيانىڭ ۇكىمەتتىك كواليتسياسىن باسقاراتىن سەربيالىق پروگرەسسيۆتى پارتيانىڭ پارلامەنت سپيكەرى انا برنابيچ وپپوزيتسيانى "تەرروريستىك باندا" دەپ ايىپتاپ، ءبىر دەپۋتاتتىڭ اۋىر جاعدايعا تۇسكەنىن حابارلادى. Associated Press اگەنتتىگىنىڭ مالىمەتى بويىنشا، كەم دەگەندە ءۇش دەپۋتات جاراقات العان.
ەسكە سالساق، 2024 جىلدىڭ 1 قاراشاسىندا جاقىندا جوندەۋدەن وتكەن نوۆي-ساد قالاسىنداعى ورتالىق تەمىرجول ۆوكزالىندا بەتوندى شاتىر قۇلاپ، 15 ادام قازا تاپقان بولاتىن. تراگەديادان كەيىن بەلگرادتا نارازىلىقتار باستالىپ، ولار ۋاقىت وتە كەلە باسقا قالالارعا دا تارادى. دەمونسترانتتار جاۋاپتى تۇلعالاردىڭ جازاسىز قالماۋىن تالاپ ەتتى. ولار نوۆي-ساد قالاسىنىڭ مەرى مەن پرەمەر-مينيستر ميلوش ۆۋچەۆيچتىڭ وتستاۆكاسىن تالاپ ەتتى.
28 قاڭتاردا ۆۋچەۆيچ وتستاۆكاعا كەتكەنىن جاريالادى. ول بۇل شەشىمنىڭ نوۆي-سادتاعى تراگەديامەن جانە نارازىلىقتار كەزىندە ءبىر ستۋدەنتتىڭ جاراقات الۋىمەن بايلانىستى ەكەنىن ايتتى. سەربيا پرەزيدەنتى الەكساندر ۆۋچيچ ونىڭ نارازىلىقتارعا الاڭدامايتىنىن مالىمدەدى.
