Aqtaý mańynda apatqa ushyraǵan AZAL ushaǵynyń ekıpaj músheleri - Igor Kshnıakın, Aleksandr Kalıanınov jáne Hokýma Alıevanyń jeke zattaryn otbasylary Ázirbaıjan Ulttyq tarıh murajaıyna tapsyrdy. Bul týraly «Azerbaycan Airlines» kompanııasy málimdedi, dep habarlaıdy “Adyrna” ulttyq portaly.
Aqparatqa sáıkes, saltanatty sharaǵa qatysýshylar qaharmandardyń erligi men janqııarlyǵy halyq jadynda máńgi saqtalatynyn atap ótti.
«Bizdiń qaharman ekıpajymyzdyń jeke zattaryn murajaıǵa tapsyrý jáne olardyń erligin máńgi qaldyrý AZAL komandasy úshin úlken qurmet jáne maqtanysh», - delingen habarlamada.
Eske salsaq, Azerbaijan Airlines áýekompanııasynyń Embraer ERJ 190-100 jolaýshy ushaǵy byltyr 25 jeltoqsanda Aqtaý mańyna qulady. Qaza tapqan 38 adamnyń altaýy – Qazaqstannyń, 25 adam – Ázerbaıjannyń, jeteýi - Reseı azamattary.
Ázerbaıjan prezıdenti Ilham Álıev ushaq apatyna "Reseıdiń ókilderi jaýapty" dep málimdedi. Álıev Reseıden kinásin moıyndaýdy jáne osy oqıǵaǵa kinálilerdi jazalaýdy talap etti. Reseı prezıdenti Vladımır Pýtın Ázerbaıjan ushaǵynyń apatqa ushyraýyna baılanysty keshirim suraǵan bolatyn.
