اۋستراليادا 2,4 ميلليون بالانىڭ ءومىرىن قۇتقارعان الەمدەگى ەڭ تانىمال دونورلاردىڭ ءبىرى دجەيمس حارريسون ومىردەن وزدى، دەپ حابارلايدى «ادىرنا» ءتىلشىسى.
قايعىلى حاباردى بۇگىن، 3 ناۋرىزدا ونىڭ وتباسى جەتكىزدى. ايتۋلارىنشا، مارقۇم 17 اقپان كۇنى 89 جاسقا قاراعان شاعىندا جاڭا وڭتۇستىك ۋەلس شتاتىنداعى قارتتار ۇيىندە ۇيىقتاپ جاتىپ كوز جۇمعان.
دجەيمس حارريسون 1936 جىلى 27 جەلتوقساندا دۇنيەگە كەلگەن. 14 جاسىندا كەۋدەسىنە كۇردەلى وتا جاسالىپ، شۇعىل تۇردە 13 ليترگە جۋىق دونورلىق قان قاجەت بولعان. وپەراتسيادان كەيىن ول اۋرۋحانادا ءۇش اي ەم قابىلداعان. دونورلىق قان ونىڭ ءومىرىن ساقتاپ قالعانىن تۇسىنگەن ءجاسوسپىرىم 18 جاسقا تولعان بويدا دونور بولۋعا شەشىم قابىلداعان. كەيىن 81 جاسىنا دەيىن ءار ەكى اپتا سايىن قان تاپسىرىپ وتىرعان. ەر ادامنىڭ پلازماسى 2,4 ميلليون ءسابيدىڭ ءومىرىن ساقتاپ قالدى، ويتكەنى ونىڭ قۇرامىندا ەرەكشە سارىسۋ جاساۋ ءۇشىن قولدانىلاتىن سيرەك يممۋنوگلوبۋلين (انتي-D) بولعان.
دجەيمس حارريسون سىڭىرگەن ەڭبەگى ءۇشىن اۆستراليا وردەنىمەن ماراپاتتالدى. ال گيننەستىڭ رەكوردتار كىتابى ونى الەمدەگى ەڭ بەلسەندى دونور دەپ تانىدى.
