يزرايل 2 ناۋرىزدان باستاپ گازا سەكتورىنا گۋمانيتارلىق كومەكتى جەتكىزۋدى توقتاتتى. بۇعان حاماس-تىڭ اقش ۇسىنعان جاڭا بىتىمگەرلىك كەلىسىمدى قابىلداۋدان باس تارتۋى سەبەپ بولدى، دەپ حابارلايدى “ادىرنا” ۇلتتىق پورتالى.
بۇل تۋرالى يزرايل پرەمەر-ءمينيسترى بينيامين نەتانياحۋدىڭ كەڭسەسى مالىمدەدى، دەپ جازدى ريا نوۆوستي.
2 ناۋرىزعا قاراعان ءتۇنى گازا سەكتورىنداعى 42 كۇنگە سوزىلعان ۋاقىتشا ءبىتىم اياقتالعاننان كەيىن، يزرايل بيلىگى اقش پرەزيدەنتىنىڭ ارنايى وكىلى ستيۆ ۋيتكوففتىڭ ءبىتىم مەرزىمىن ۇزارتۋ جونىندە جاڭا ۇسىنىس جاساعانىن حابارلادى. ويتكەنى، قازىرگى تاڭدا يزرايل مەن حاماس اراسىندا سوعىستى تولىق توقتاتۋ ماسەلەسىندە كەلىسپەۋشىلىكتەر شەشىلمەي وتىر.
نەتانياحۋ كەڭسەسىنىڭ مالىمەتىنشە، يزرايل بۇل جوسپارعا كەلىستى، الايدا حاماس قابىلداماعان.
"تۇتقىندارعا قاتىستى العاشقى كەلىسىم اياقتالعاننان كەيىن جانە ۋيتكوفف ۇسىنعان كەلىسسوزدەر فورماتىن حاماس-تىڭ قابىلداۋدان باس تارتۋىنا بايلانىستى، يزرايل پرەمەر-ءمينيسترى نەتانياحۋ بۇگىننەن باستاپ گازا سەكتورىنا تاۋارلار مەن جەتكىزىلىمدەردى توقتاتۋ تۋرالى شەشىم قابىلدادى", – دەلىنگەن مالىمدەمەدە.
