استاناداعى جەڭىل رەلستى كولىك جۇيەسى ىسكە قوسىلعالى بەرى جولاۋشىلار سانى 180 مىڭ ادامعا جەتتى، دەپ حابارلايدى “ادىرنا” ۇلتتىق پورتالى.
بۇل تۋرالى City Transportation Systems باسقارما توراعاسى اسىلبەك دۇيسەباەۆ مالىمدەدى.
ونىڭ ايتۋىنشا، LRT ىسكە قوسىلعان العاشقى كۇنى 100 مىڭ ادام قىزمەتتى پايدالانعان. بۇل كورسەتكىش جۇيەنىڭ جوبالىق وتكىزۋ مۇمكىندىگىنەن اسىپ تۇسكەن.
«قازىرگى ۋاقىتتا جولاۋشىلار اعىنى شامامەن ەكى ەسە ازايدى. قوزعالىس قالىپتى رەجيمدە جۇزەگە اسىرىلىپ جاتىر، ەشقانداي قاۋىپسىزدىك ەرەجەلەرىن بۇزۋ فاكتىلەرى تىركەلگەن جوق»، – دەدى اسىلبەك دۇيسەباەۆ.
CTS وكىلدەرى جولاۋشىلاردى قاۋىپسىزدىك تالاپتارىن ساقتاۋعا شاقىردى. اتاپ ايتقاندا، توتەنشە جاعداي باتىرمالارىن سەبەپسىز باسپاۋ، پويىز ەسىكتەرىن ءوز بەتىنشە اشپاۋ جانە ولاردىڭ جابىلۋىنا كەدەرگى كەلتىرمەۋ كەرەكتىگى ەسكەرتىلدى. مۇنداي ارەكەتتەر پويىزداردىڭ ۋاقىتشا توقتاۋىنا سەبەپ بولۋى مۇمكىن ەكەنى حابارلارعان.
ەسكە سالايىق، 16 مامىر كۇنى مەملەكەت باسشىسى قاسىم-جومارت توقاەۆ استاناداعى LRT جۇيەسىنىڭ رەسمي ىسكە قوسىلۋىنا قاتىسىپ، العاشقى جولاۋشى رەتىندە بىرنەشە ستانتسيا اراسىندا ءجۇرىپ ءوتتى.
