1 наурыз күні сағат 10:20 шамасында Атырау облысындағы Тендік станциясының теміржол өткелінде ірі жол-көлік оқиғасы болды. Жүк көлігі жүргізушісінің жол қозғалысы ережелерін бұзуынан жүк пойызына соқтығысып, локомотив пен 11 бос вагон рельстен шығып кетті, деп хабарлайды "Адырна" ұлттық порталы.
Апат салдарынан локомотив бригадасының қызметкерлері жарақат алды. Қазіргі уақытта оқиғаның мән-жайы анықталуда.
"2024 жылы теміржол өткелдерінде автокөлік жүргізушілерінің жол қозғалысы ережелерін бұзуына байланысты 28 жол-көлік оқиғасы тіркелді. ҚТЖ осындай жағдайлардың алдын алу үшін теміржол өткелдеріндегі қауіпсіздік ережелерін сақтаудың маңыздылығын ескертеді," – деп мәлімдеді «Қазақстан темір жолы» ҰК» АҚ баспасөз қызметі.
Еске сала кетсек, бұған дейін Қарағанды облысында жүк пойызының вагондары рельстен шығып кеткені туралы хабарланған болатын.
