قازاقستاننىڭ قارجى مينيسترلىگى BI Group جانە BAZIS قۇرىلىس كومپانيالارىنىڭ سالىقتان جالتارۋ فاكتىلەرىن انىقتادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
مينيسترلىكتىڭ مالىمەتىنشە، BI Group كومپانياسى 11,9 ميلليارد تەڭگە، ال BAZIS كومپانياسى 4,6 ميلليارد تەڭگە سالىق تولەۋدەن جالتارعان.
تەكسەرۋ 2022-2023 جىلدارداعى ارنايى سالىق رەجيمدەرىن (سنر) پايدالاناتىن سۋبەكتىلەر مەن جالپىعا ورتاق سالىق تارتىبىندە جۇمىس ىستەيتىن كومپانيالار اراسىنداعى ءوزارا ەسەپ ايىرىسۋدى تالداۋ نەگىزىندە جۇرگىزىلگەن.
"تالداۋ ناتيجەسىندە ارنايى سالىق رەجيمدەرىن قولدانۋ ارقىلى اتالعان كومپانيالار سالىق تولەمدەرىن قىسقارتقانى انىقتالدى", – دەلىنگەن مينيسترلىك حابارلاماسىندا.
ۆەدومستۆو كامەرالدىق باقىلاۋ جۇرگىزۋ ارقىلى كومپانيالارعا ءوز قاتەلىكتەرىن ءوز ەركىمەن تۇزەتۋگە مۇمكىندىك بەرەدى. ياعني، تەكسەرۋ جۇرگىزبەي-اق، سالىق مىندەتتەمەلەرىن قايتا ەسەپتەپ، ءتيىستى تولەمدەردى جاساۋ ۇسىنىلادى.
بۇعان دەيىن قازاقستاننىڭ پرەمەر-ءمينيسترى ولجاس بەكتەنوۆ كاسىپكەرلەردى ەكى اپتانىڭ ىشىندە ءادىل سالىق تولەۋگە شاقىرعان بولاتىن. ول ميللياردتاعان اينالىمى بار كومپانيالاردىڭ بيۋدجەتكە تابىسىنا ساي ەمەس تولەم جاساپ وتىرعانىن اتاپ ءوتتى.
