Qazaqstannyń Qarjy mınıstrligi BI Group jáne BAZIS qurylys kompanııalarynyń salyqtan jaltarý faktilerin anyqtady, dep habarlaıdy "Adyrna" ulttyq portaly Tengrinews.kz-ke siltep.
Mınıstrliktiń málimetinshe, BI Group kompanııasy 11,9 mıllıard teńge, al BAZIS kompanııasy 4,6 mıllıard teńge salyq tóleýden jaltarǵan.
Tekserý 2022-2023 jyldardaǵy arnaıy salyq rejımderin (SNR) paıdalanatyn sýbektiler men jalpyǵa ortaq salyq tártibinde jumys isteıtin kompanııalar arasyndaǵy ózara esep aıyrysýdy taldaý negizinde júrgizilgen.
"Taldaý nátıjesinde arnaıy salyq rejımderin qoldaný arqyly atalǵan kompanııalar salyq tólemderin qysqartqany anyqtaldy", – delingen mınıstrlik habarlamasynda.
Vedomstvo kameraldyq baqylaý júrgizý arqyly kompanııalarǵa óz qatelikterin óz erkimen túzetýge múmkindik beredi. Iaǵnı, tekserý júrgizbeı-aq, salyq mindettemelerin qaıta eseptep, tıisti tólemderdi jasaý usynylady.
Buǵan deıin Qazaqstannyń premer-mınıstri Oljas Bektenov kásipkerlerdi eki aptanyń ishinde ádil salyq tóleýge shaqyrǵan bolatyn. Ol mıllıardtaǵan aınalymy bar kompanııalardyń bıýdjetke tabysyna saı emes tólem jasap otyrǵanyn atap ótti.
