يزرايل گازا سەكتورىندا قالعان 63 تۇتقىندى قايتارۋ ءۇشىن 42 كۇندىك ءبىتىمدى ۇزارتۋ مۇمكىندىگىن قاراستىرىپ جاتىر، دەپ حابارلايدى "ادىرنا" ۇلتتىق پورتالى Reuters-قا سىلتەپ.
الايدا، اتىستى توقتاتۋدىڭ ەكىنشى كەزەڭى بويىنشا كەلىسسوزدەر كەيىنگە شەگەرىلدى.
ءبىتىمنىڭ ءبىرىنشى كەزەڭى 19 قاڭتاردا كۇشىنە ەنىپ، سەنبى كۇنى اياقتالۋى ءتيىس. بىراق ونىڭ ءارى قاراي قالاي جالعاساتىنى ازىرگە بەلگىسىز.
ء"بىز اسا ساقتىق تانىتىپ وتىرمىز. قازىرگى ءبىتىمدى جالعاستىرۋ مۇمكىندىگىن جوققا شىعارمايمىز، بىراق ول ءبىزدىڭ تۇتقىندارىمىز قايتارىلعان جاعدايدا عانا ىسكە اسادى. ولار امان-ەسەن ورالۋى كەرەك", – دەپ مالىمدەدى ءيزرايلدىڭ سىرتقى ىستەر ءمينيسترىنىڭ ورىنباسارى شاررەن حاسكەل يەرۋساليمدە وتكەن ءباسپاسوز ءماسليحاتىندا.
ەكىنشى كەزەڭنىڭ اياسىندا قالعان تۇتقىنداردى بوساتۋ جانە يزرايل اسكەرىن گازادان تولىق شىعارۋ قاراستىرىلعان. ەگەر جۇماعا دەيىن كەلىسىمگە قول جەتكىزىلمەسە، اسكەري قاقتىعىس قايتا جالعاسۋى مۇمكىن نەمەسە جاعداي تۇيىقتالىپ، ءبىتىم ساقتالعانىمەن، تۇتقىندار قايتارىلماي قالۋى ىقتيمال. سونىمەن قاتار، يزرايل گازاداعى گۋمانيتارلىق كومەكتىڭ كىرۋىنە توسقاۋىل قويا الادى.
Reuters اگەنتتىگىنىڭ دەرەككوزدەرى يزرايل مەن حاماس-تىڭ ءبىتىمنىڭ ەكىنشى كەزەڭى بويىنشا كەلىسسوزدەر جۇرگىزبەگەنىن حابارلادى.
قازىرگى تاڭدا 33 يزرايلدىك تۇتقىننىڭ 29-ى بوساتىلدى، سونىمەن قاتار بەس تايلاندتىق ازامات تا ەركىندىككە شىقتى. ولار جۇزدەگەن پالەستينالىق تۇتقىندارمەن الماستىرىلدى. دەگەنمەن، تاعى ءتورت يزرايلدىكتىڭ دەنەسى ءالى تابىستالماعان.
يزرايل 600-دەن استام پالەستينالىق تۇتقىندى بوساتۋدى كەيىنگە قالدىرىپ وتىر. ەل بيلىگى حاماس-تى كەلىسىمدى بۇزدى دەپ ايىپتاپ، يزرايلدىك تۇتقىنداردى گازا سەكتورىندا كوپشىلىك الدىندا جاريا تۇردە بوساتۋدى ۇيىمداستىرعانىن مالىمدەدى.
