İzrail Gaza sektoryndaǧy bıtımdı ūzartudy qarastyruda

İzrail Gaza sektorynda qalǧan 63 tūtqyndy qaitaru üşın 42 kündık bıtımdı ūzartu mümkındıgın qarastyryp jatyr, dep habarlaidy "Adyrna" ūlttyq portaly Reuters-qa sıltep. Alaida, atysty toqtatudyŋ ekınşı kezeŋı boiynşa kelıssözder keiınge şegerıldı. Bıtımnıŋ bırınşı kezeŋı 19 qaŋtarda küşıne enıp, senbı künı aiaqtaluy tiıs. Bıraq onyŋ ärı qarai qalai jalǧasatyny äzırge belgısız. "Bız asa saqtyq tanytyp otyrmyz. Qazırgı bıtımdı jalǧastyru mümkındıgın joqqa şyǧarmaimyz, bıraq ol bızdıŋ tūtqyndarymyz qaitarylǧan jaǧdaida ǧana ıske asady. Olar aman-esen oraluy kerek", – dep mälımdedı İzraildıŋ syrtqy ıster ministrınıŋ orynbasary Şarren Haskel İerusalimde ötken baspasöz mäslihatynda. Ekınşı kezeŋnıŋ aiasynda qalǧan tūtqyndardy bosatu jäne İzrail äskerın Gazadan tolyq şyǧaru qarastyrylǧan. Eger jūmaǧa deiın kelısımge qol jetkızılmese, äskeri qaqtyǧys qaita jalǧasuy mümkın nemese jaǧdai tūiyqtalyp, bıtım saqtalǧanymen, tūtqyndar qaitarylmai qaluy yqtimal. Sonymen qatar, İzrail Gazadaǧy gumanitarlyq kömektıŋ kıruıne tosqauyl qoia alady. Reuters agenttıgınıŋ derekközderı İzrail men HAMAS-tyŋ bıtımnıŋ ekınşı kezeŋı boiynşa kelıssözder jürgızbegenın habarlady. Qazırgı taŋda 33 izraildık tūtqynnyŋ 29-y bosatyldy, sonymen qatar bes tailandtyq azamat ta erkındıkke şyqty. Olar jüzdegen palestinalyq tūtqyndarmen almastyryldy. Degenmen, taǧy tört izraildıktıŋ denesı älı tabystalmaǧan. İzrail 600-den astam palestinalyq tūtqyndy bosatudy keiınge qaldyryp otyr. El bilıgı HAMAS-ty kelısımdı būzdy dep aiyptap, izraildık tūtqyndardy Gaza sektorynda köpşılık aldynda jariia türde bosatudy ūiymdastyrǧanyn mälımdedı.