Bas áskerı prokýrordyń birinshi orynbasary Maqsat Qazıev áskerde múgedek bolyp qalǵan merzimdi áskerı qyzmetshi Erbaıan Muhtardyń isine qatysty pikir bildirdi. Bul týraly ol 25 aqpanda Ortalyq kommýnıkaııalar qyzmetinde ótken brıfıngte aıtty, dep habarlaıdy “Adyrna” ulttyq portaly.
Ol áskerı qyzmetshi Muhtar Erbaıannyń alǵan aýyr jaraqatyna baılanysty birqatar jedel-tergeý sharalary júrgizilip jatqanyn, saraptamalar taǵaıyndalǵanyn atap ótti. Barlyq dálelder jınalǵannan keıin sheshim qabyldanady. Is Bas prokýror men Bas áskerı prokýrordyń erekshe baqylaýynda.
"Qazirgi ýaqytta bul is boıynsha naqty kúdiktiler joq. Belgili bir top bar, olar tergeýde", – dedi Maqsat Qazıev.
Ishki ister mınıstrligi Ulttyq ulannyń tárbıe jáne áleýmettik-quqyqtyq jumysy bas basqarmasynyń bastyǵy Nurbaı Bektursynov Erbaıan Muhtardyń Túrkııada emdelgenin eske saldy. Endi ol emdeýdiń ekinshi kezeńinen ótedi. Oǵan Ulttyq ulan sarbazdary men basqa da memlekettik organdar kómek kórsetti.
"Biz ata-analarmen baılanystamyz jáne qoldan kelgen kómegimizdi kórsetemiz. Qyzmettik tekserý júrgizildi. Erbaıan Muhtarǵa qatysty zań buzýshylyq nemese qysym kórsetý faktileri bolmaǵany anyqtaldy", – dedi ol.
Qorǵanys mınıstrligi Tárbıe jáne ıdeologııalyq jumys departamentiniń basshysy Tileýhan Basqojaev Erbaıan Muhtardyń Qorǵanys mınıstrliginiń áskerı ushaǵy Túrkııaǵa emdelýge jetkizilgenin qosty. Aldaǵy ýaqytta bólim oǵan qoldaý kórsetýge daıyn.
Buǵan deıin Qorǵanys mınıstrligi Erbaıan Muhtardyń 2023 jyly 4 jeltoqsanda dárethanadaǵy plıtkaǵa basyn soǵyp, jaraqat alǵanyn habarlaǵan.
