مەملەكەت باسشىسى قاسىم-جومارت توقاەۆ ومان سىرتقى ىستەر ءمينيسترى بادر ءال-ءبۋسايديدى قابىلدادى، دەپ حابارلايدى “ادىرنا” ۇلتتىق پورتالى.
پرەزيدەنت بادر ءال-بۋسايديگە ءىلتيپات بىلدىرە وتىرىپ، وماندى قازاقستانىڭ سەنىمدى ءارى ۋاقىت تەزىنەن وتكەن سەرىكتەسى دەپ اتادى. سونداي-اق ەكى ەل اراسىنداعى ىنتىماقتاستىقتى ودان ءارى دامىتۋعا بەيىل ەكەنىن جەتكىزدى.
پرەزيدەنتتىڭ ايتۋىنشا، قازاقستان مەن ومان ەكىجاقتى دەڭگەيدەگى، سونىمەن قاتار وڭىرلىك جانە حالىقارالىق كۇن تارتىبىندەگى ءوزارا ىقپالداستىقتى دامىتا الادى. وعان ايتارلىقتاي الەۋەت بار.
مەملەكەت باسشىسى ورايلى ءساتتى پايدالانىپ، ومان سۇلتانى حايسام بەن تاريققا سالەمىن جولداپ، ونى ەلىمىزگە ساپارمەن كەلۋگە شاقىردى.
"قازاقستاننىڭ ومان مەملەكەتىنە قۇرمەتى ەرەكشە. ءسىزدىڭ ەلىڭىزگە ازاماتتارىمىزدىڭ، سونىڭ ىشىندە كاسىپكەرلەردىڭ، مادەنيەت قايراتكەرلەرىنىڭ قىزىعۋشىلىعى وتە جوعارى. سوندىقتان ىنتىماقتاستىعىمىزدى جان-جاقتى جانە تابىستى ەتە ءتۇسۋ ءۇشىن وعان تىڭ سەرپىن بەرۋ قاجەت", - دەدى قاسىم-جومارت توقاەۆ.
ومان سىرتقى ساياسات ۆەدومستۆوسىنىڭ باسشىسى قوناقجايلىق تانىتقانى ءۇشىن پرەزيدەنتكە العىس ايتىپ، بۇل ەكى ەل اراسىنداعى ءوزارا قۇرمەتتىڭ جوعارى دەڭگەيىن كورسەتەتىنىن اتاپ ءوتتى.
"قازاقستاننىڭ دامۋىنا زور قىزىعۋشىلىقپەن قارايمىز. ەلىڭىز بەن حالقىڭىزدىڭ يگىلىگى جولىندا اتقارىپ جاتقان اۋقىمدى رەفورمالارىڭىز ءبىزدى قايران قالدىرادى. قازاقستان ەكونوميكاسىنىڭ ءوسۋ قارقىنى، بەيبىتشىلىك پەن قاۋىپسىزدىكتى ساقتاۋ ءۇشىن ەلىڭىزدىڭ وسى ايماقتاعى تاتۋ كورشىلىك بايلانىستاردى نىعايتۋداعى نەگىزگى ءرولى مەن ىقپالى تاڭعالدىرادى. ادىلدىك پەن بارشاعا ورتاق بەيبىتشىلىككە، قاۋىپسىزدىك پەن وركەندەۋگە باعىتتالعان سىرتقى ساياساتتاعى ۇستانىمىڭىزدى جوعارى باعالايمىز", - دەدى ديپلومات.
كەزدەسۋ بارىسىندا كولىك-لوگيستيكالىق، اۋىلشارۋاشىلىق، مادەني-گۋمانيتارلىق جانە تسيفرلاندىرۋ سالالارىنداعى ىنتىماقتاستىق پەرسپەكتيۆاسى قاراستىرىلدى. سونداي-اق ءوزارا بايلانىستاردى نىعايتۋعا سەپتىگىن تيگىزەتىن ەكى ەل اراسىنداعى تىكەلەي اۋە قاتىناستارىن اشۋ ماسەلەسى تالقىلاندى.
بۇدان بولەك، قاسىم-جومارت توقاەۆ پەن بادر ءال-بۋسايدي وڭىرلىك قاۋىپسىزدىككە جانە كوپجاقتى ۇيىمدار اياسىنداعى ىقپالداستىققا قاتىستى وزەكتى ماسەلەلەر بويىنشا پىكىر الماستى.
