2025 جىلى 18 اقپاندا قازاقستان رەسپۋبليكاسىنىڭ مەملەكەتتىك كىرىستەر كوميتەتى 600-گە جۋىق قازاقستاندىق بلوگەر سالىق دەكلاراتسياسىندا تابىسىن تومەندەتىپ كورسەتكەنىن حابارلادى. «جاسىرىلعان» تابىستىڭ جالپى سوماسى 53,3 ملرد تەڭگەنى قۇرادى. بۇل شەشىممەن كەلىسپەگەن جاعدايدا ولاردا قوسىمشا ەسەپ بەرۋ نەمەسە تۇسىنىكتەمە بەرۋ ءۇشىن ءبىر اي ۋاقىت بار. سالىق سالاسى بويىنشا ساراپشى، Salyqtez زاڭ فيرماسىنىڭ باسقارۋشى سەرىكتەسى ايدار ماساتباەۆ Taspanews.kz رەداكتسياسىنا بۇل ميللياردتاردىڭ قايدان شىققانى، بلوگەرلەردىڭ قانداي كامەرالدىق باقىلاۋ حابارلامالارىن العانى جانە سالىقتى ەسەپتەۋ كەزىندەگى مۇمكىن بولاتىن تەحنيكالىق قاتەلەر تۋرالى ايتىپ بەردى.
«رەسەيدە جۇرگىزىلگەن ەلەنا بلينوۆسكايا سياقتى بلوگەرلەردى تەكسەرۋ ۇدەرىسى بىزگە دە كەلىپ جەتتى. بىرىنشىدەن، سالىق ورگاندارى ولاردا ءبىزدىڭ جەكە كارتالارىمىز جايلى كوپ اقپارات بارىن ايتادى، الايدا ونى اشىپ دالەلدەي المايدى. مەنىڭ ويىمشا، سالىق ەسەپتەۋ ءۇشىن ارنايى ءىس جۇزىندە ءتيىمدى پراكتيكا ويلاستىرىلىپ، تاجىريبەدەن وتكىزىلىپ، قولدانىسقا ەنگىزىلۋى كەرەك. سوندا ناقتى ساندارعا جاقىنداۋ مۇمكىن بولار ەدى»،
سالىق سالاسى بويىنشا ساراپشى بلوگەرلەردىڭ تابىسى تۋرالى اقپارات اۋدارىمداردان دا تۇرۋى مۇمكىن ەكەنىن ءتۇسىندىردى.
«ولارعا ۇلكەن كولەمدە قاراجات اۋدارىلۋى مۇمكىن. الايدا بلوگەرلەردىڭ كوپ بولىگى قايىرىمدىلىق اكتسيالارىنا قاتىسىپ تۇرادى، ياعني ولار اقشانى قايىرىمدىلىق نەمەسە باسقا دا باستامالار ءۇشىن جيناۋى ىقتيمال»،
سونداي-اق، ساراپشى ءوز پىكىرىندە تابىس تۋرالى اقپارات ەكونوميكالىق ىنتىماقتاستىق جانە دامۋ ۇيىمى باستاماسى بويىنشا قارالعان Common Reporting Standards – بىرىڭعاي ەسەپ بەرۋ ستاندارتتارىنان الىنعان بولۋى مۇمكىن ەكەنىن مالىمدەدى. بۇل ستاندارتقا سايكەس شەتەلدەن كەلەتىن كىرىستەر تۋرالى اقپارات بەرىلەدى.
«مۇمكىن، ولار Youtube پلاتفورماسىنان تولەمدەر الىپ تۇرعان بولار»،
ساراپشى Youtube ءوز تولەمدەرىنىڭ ەڭ جوعارى پايىزىن امەريكاندىق نارىقتا جاسايتىنىن ايتتى. بۇل جاعدايدا بلوگەرلەر جان-جاقتى قورعالعان، سەبەبى ولاردىڭ ماتەريالىندا ورنالاستىرىلعان جارناما ءۇشىن سىياقىنى YouTube تولەيدى. وسى سىياقىدان سالىق اقش-تا الىنىپ قويادى. ول 30%-دى قۇرايدى.
«سونىمەن قاتار، سالىق ەسەپتەۋ كەزىندە اقاۋلار بولۋى مۇمكىن. وسى سالادا قىزمەت اتقاراتىن كەڭەسشى رەتىندە مۇنداي جاعداي ءجيى كەزدەسەدى دەپ ايتا الامىن. ماسەلەن، تولەنىپ قويعان كولىك سالىعى بويىنشا قايتادان بەرەشەك شىققان. تەحنيكالىق قاتەلەر دە بولىپ جاتادى»،
ايدار ماساتباەۆ تىزىمدەگى بلوگەرلەر ەندى ماسەلەسىن شەشۋ ءۇشىن سالىق ورگاندارىمەن تىعىز بايلانىستا بولۋى قاجەت ەكەنىن ءتۇسىندىردى، سەبەبى كامەرالدى باقىلاۋ حابارلامالارىنداعى اقپارات اقش-تاعى Deficiency سەكىلدى تۇپكىلىكتى بولماۋى مۇمكىن. ەندىگى كەزەكتە بلوگەرلەر ءار اقشالاي اۋدارىمدى نەگىزدەپ، ءار كىرىسى بويىنشا ەسەپ بەرۋ كەرەك.
«ەگەر بلوگەرلەر، ايتىپ وتكەنىمىزدەي قايىرىمدىق شارالارى نەمەسە باسقا دا الەۋمەتتىك شارالار بويىنشا قاراجات جيناعان بولسا، الايدا ناقتى قانداي شارادان كەلگەن اقشا ەكەنىن، ونى كىم اۋدارعانىن ناقتى ەسىندە ساقتاماسا، ەسەپ بەرۋ قيىنعا سوعادى»،
