اقش پرەزيدەنتىنىڭ اكىمشىلىگى اق ءۇيدىڭ رەسمي سايتىندا پرەزيدەنت دونالد ترامپ تۋرالى «جالعان جاڭالىقتار» تاراتقان دەپ ايىپتالعان مەديانىڭ ءتىزىمى جاريالاناتىن جاڭا ءبولىمدى ىسكە قوستى، دەپ حابارلايدى «ادىرنا» ءتىلشىسى.
اق ءۇيدىڭ ءباسپاسوز حاتشىسى كارولين لەۆيتتىڭ ايتۋىنشا، بۇل شەشىمنىڭ ماقساتى – «جالعان جاڭالىقتاردى» بۇرىن-سوڭدى بولماعان دەڭگەيدە جاۋاپكەرشىلىككە تارتۋ.
جاڭادان پايدا بولعان «بىرجاقتى جانە جاڭىلىستىراتىن اقپاراتتى اشكەرەلەۋ» بولىمىندە «اپتانىڭ مەديا قىلمىسكەرى»، «ۇيات تاقتاسى»، «كوشباسشىلار تاقتاسى»، «رەتسيديۆيستەر» سىندى ايدارلار بار.
تىزىمگە اقش پەن ۇلىبريتانيانىڭ ەڭ ءىرى اعىلشىنتىلدى تەلەارنالارى، اقپاراتتىق اگەنتتىكتەرى، جاڭالىق پورتالدارى مەن گازەتتەرى ەنگەن. ولاردىڭ ىشىندە MSNBC, CBS News, ABC News, BBC, CNN, The Washington Post, The New York Times, The Wall Street Journal, Politico, Axios, Associated Press, The Hill, The Boston Globe, The Independent, Los Angeles Times جانە USA Today بار.
«ۇيات تاقتاسى» اتتى بەتتە Washington Post, CBS News, CNN جانە MSNBC سەكىلدى باسىلىمدار كورسەتىلگەن. اكىمشىلىك نۇسقاسى بويىنشا، بۇل مەديا ۇيىمدار جالعان دەرەكتەر نەمەسە كونتەكستى بۇرمالايتىن ماتەريالدار جاريالاعان.
ەرەكشە نازار «اپتانىڭ مەديا قىلمىسكەرى» ايدارىنا اۋدارىلعان. وندا تاعى دا CBS News, سونداي-اق Boston Globe جانە بريتاندىق Independent اتالادى. اكىمشىلىكتىڭ مالىمدەۋىنشە، بۇل باسىلىمدار پرەزيدەنت ترامپتىڭ دەموكراتتاردى جاۋاپكەرشىلىككە تارتۋ جونىندەگى ۇندەۋلەرىن بۇرمالاعان.
بۇعان دەيىن اقش پرەزيدەنتى BBC تىلشىلەرىن ءوزىنىڭ ءسوزىن بۇرمالاپ، 2024 جىلعى پرەزيدەنت سايلاۋىنىڭ قورىتىندىسىنا ىقپال ەتۋگە تىرىسقان دەپ ايىپتاعان ەدى.
