ماڭعىستاۋ وبلىسى مۇنايلى اۋدانى اقتاۋ قالاسىنا جاقىن جەردە ورنالاسقان تۇرعىن الابىندا ءبىر وتباسى گازعا ۋلانىپ، ءۇش ادام قازا تاپتى. مالىمەتتەردى جەرگىلىكتى بيلىك راستادى، دەپ حابارلايدى “ادىرنا” ۇلتتىق پورتالى.
مالىمەت بويىنشا، 23 اقپاندا مۇنايلى اۋدانىندا ورنالاسقان "قالامقاس" تۇرعىن الابىندا ءورت بولدى.
ء“بىر وتباسىنىڭ ءتورت مۇشەسى كومىرقىشقىل گازىنان ۋلانعان. وقيعا ورنىندا ءۇش ادام قازا تاپتى، ونىڭ ەكەۋى – جاسوسپىرىم. ءبىر ادام امان قالدى. ول اۋىر حالدە وبلىستىق كوپسالالى اۋرۋحاناعا جاتقىزىلدى”، دەلىنگەن ماڭعىستاۋ وبلىسى توتەنشە جاعدايلار دەپارتامەنتىنىڭ حابارلاماسىندا.
مۇنايلى اۋدانى اكىمدىگىنىڭ ءباسپاسوز قىزمەتى مارقۇمداردىڭ وتباسىلارىنا ماتەريالدىق كومەك كورسەتىلگەنىن حابارلادى. باسقا دا قاجەتتى قولداۋ شارالارى قابىلداندى دەيدى.
الدىن الا بولجام بويىنشا، ۇيدەگى جىلىتۋ پەشىنىڭ مۇرجاسى بولماعان. وسىنىڭ سالدارىنان ۋلى گاز سىرتقا شىقپاي، ءۇي ىشىنە جايىلعان.
