ەتنيكالىق قازاقتارعا قازاقستاندا 10 جىل ءومىر سۇرۋگە جانە جۇمىس ىستەۋگە قۇقىق بەرەتىن 65 «اتا جولى» كارتاسى بەرىلدى. بۇل تۋرالى بۇگىن، 24 اقپاندا ەڭبەك جانە حالىقتى الەۋمەتتىك قورعاۋ مينيسترلىگى ايتتى، دەپ حابارلايدى «ادىرنا» ءتىلشىسى.
رەسمي دەرەكتەرگە سۇيەنسەك، ەلىمىزدە ءوز ءىسىن دامىتۋعا دايىن بيزنەس-يمميگرانتتار 27 كارتا العان، ال سۇرانىسقا يە ماماندار وسىنداي 38 كارتانىڭ يەگەرى اتانعان.
«اتا جولى» كارتاسىن الۋشىلار ىشىندە ينجەنەر-فيزيك، ينجەنەر-ماتەماتيك، حيميالىق تەحنولوگتار، جاق-بەت حيرۋرگياسىنىڭ دارىگەرلەرى، پەدياترلار جانە تاعى باسقا ماماندار بار. ولار رەسەي، گەرمانيا، موڭعوليا، قىتاي، ۇلىبريتانيا، اقش، يزرايل، فرانتسيا، نيدەرلاندى، فينليانديا، قىرعىزستان جانە وزبەكستان سەكىلدى شەت ەلدەردەن كەلدى.
«اتا جولى» كارتاسىن ەنگىزۋدىڭ ماقساتى تاريحي وتانىمەن بايلانىستى نىعايتۋ، ۇلتتىق داستۇرلەردى ساقتاۋ، قازاقستاندا ولاردىڭ الەۋەتىن ىسكە اسىرۋ ءۇشىن ەلگە كاسىپقويلار مەن تابىستى بيزنەسمەندەردى تارتۋ بولىپ تابىلادى. بۇل كارتا شەتەلدە تۇراتىن ەتنيكالىق قازاقتارعا ءوز شىعۋ ەلدەرىنىڭ ازاماتتىعىن ساقتاي وتىرىپ بەرىلەدى»،—دەلىنگەن حابارلامادا.
ايتا كەتەيىك، «اتا جولى» كارتاسىنىڭ يەگەرلەرى ەلگە كىرگەن كەزدە 10 جىل مەرزىمگە تۇرۋعا رۇقسات الادى جانە ەڭبەك قىزمەتىن جۇزەگە اسىرۋ نەمەسە بيزنەس جۇرگىزۋ ءۇشىن قونىستانۋ ءوڭىرىن دەربەس تاڭدايدى.
