Etnıkalyq qazaqtarǵa Qazaqstanda 10 jyl ómir súrýge jáne jumys isteýge quqyq beretin 65 «Ata joly» kartasy berildi. Bul týraly búgin, 24 aqpanda Eńbek jáne halyqty áleýmettik qorǵaý mınıstrligi aıtty, dep habarlaıdy «Adyrna» tilshisi.
Resmı derekterge súıensek, elimizde óz isin damytýǵa daıyn bıznes-ımmıgranttar 27 karta alǵan, al suranysqa ıe mamandar osyndaı 38 kartanyń ıegeri atanǵan.
«Ata joly» kartasyn alýshylar ishinde ınjener-fızık, ınjener-matematık, hımııalyq tehnologtar, jaq-bet hırýrgııasynyń dárigerleri, pedıatrlar jáne taǵy basqa mamandar bar. Olar Reseı, Germanııa, Mońǵolııa, Qytaı, Ulybrıtanııa, AQSh, Izraıl, Franııa, Nıderlandy, Fınlıandııa, Qyrǵyzstan jáne Ózbekstan sekildi shet elderden keldi.
«Ata joly» kartasyn engizýdiń maqsaty tarıhı otanymen baılanysty nyǵaıtý, ulttyq dástúrlerdi saqtaý, Qazaqstanda olardyń áleýetin iske asyrý úshin elge kásipqoılar men tabysty bıznesmenderdi tartý bolyp tabylady. Bul karta shetelde turatyn etnıkalyq qazaqtarǵa óz shyǵý elderiniń azamattyǵyn saqtaı otyryp beriledi»,—delingen habarlamada.
Aıta keteıik, «Ata joly» kartasynyń ıegerleri elge kirgen kezde 10 jyl merzimge turýǵa ruqsat alady jáne eńbek qyzmetin júzege asyrý nemese bıznes júrgizý úshin qonystaný óńirin derbes tańdaıdy.
