بۇگىن ۇلىتاۋ وبلىسىنىڭ اكىمدىگى مەن «كازتسينك» جشس اراسىندا ەكىجاقتى ىنتىماقتاستىق جانە ءوزارا ءىس-قيمىل تۋرالى مەموراندۋمعا قول قويۋ ءراسىمى ءوتتى.
بۇل كەلىسىم ۇلىتاۋ وبلىسىنىڭ ەكونوميكالىق دامۋىن قولداۋعا، الەۋمەتتىك جانە ينفراقۇرىلىمدىق جوبالاردى جۇزەگە اسىرۋعا باعىتتالعان. قۇجاتقا قول قويۋ بارىسىندا ۇلىتاۋ وبلىسىنىڭ اكىمى جانە «كازتسينك» جشس باسشىلىعى ەكى تاراپتىڭ سەرىكتەستىگى ءوڭىردىڭ تۇراقتى دامۋىنا ەلەۋلى ۇلەس قوساتىنىن اتاپ ءوتتى.
قۇجاتقا سايكەس، «كازتسينك» جشس اعىمداعى جىلى ۇلىتاۋ وبلىسىنداعى جايرەم كەنتىندە ىسكە اسىرىلىپ جاتقان 10 الەۋمەتتىك جوبانى قارجىلاندىرادى. بۇل جوبالار دەنساۋلىق ساقتاۋ، سپورت، ينفراقۇرىلىم جانە الەۋمەتتىك نىسانداردى اباتتاندىرۋ سالالارىن قامتيدى.
2025 جىلعا ارنالعان ءىرى باستامالاردىڭ ىشىندە تومەندەگىلەردى اتاپ وتۋگە بولادى: سپورت كەشەنىنىڭ قۇرىلىسى، 60 پاتەرلى تۇرعىن ءۇي قۇرىلىسى جوباسى اياسىندا سىرتقى جەلىلەردى ورناتۋ جانە اۋماقتى اباتتاندىرۋ جۇمىستارى، سونداي-اق، قازاندىق جانە تۇرعىن ۇيلەر ءۇشىن كومىر ساتىپ الۋ. بۇدان باسقا، دارىگەرلەر مەن مۇعالىمدەردى قوسا العاندا، بيۋدجەت سالاسىنىڭ قىزمەتكەرلەرى ءۇشىن 20 پاتەر ساتىپ الۋ جوسپارلانۋدا.
ايتا كەتەيىك، ۇلىتاۋ وبلىسىنىڭ اكىمدىگى مەن كازتسينك كومپانياسى اراسىنداعى ىنتىماقتاستىق 2022 جىلدىڭ قاراشا ايىندا باستالدى، سودان بەرى ايماقتىڭ دامۋىنا جانە ونىڭ تۇرعىندارىنىڭ ءومىر ءسۇرۋ دەڭگەيىن ارتتىرۋعا وڭ اسەر ەتكەن كوپتەگەن جوبالار ىسكە اسىرىلدى.
