پوليتسيا جۋرناليست ءمولدىر نۇرماننىڭ ۇستىنەن قىلمىستىق ءىس قوزعالعانى تۋرالى اقپارات تاراتتى، دەپ حابارلايدى "ادىرنا" ۇلتتىق پورتالى.
قۇزىرلى ورگاننىڭ مالىمەتىنشە، جۋرناليستكە "جالعان اقپارات تاراتۋ" بابى بويىنشا ءىس قوزعالىپ، تەرگەۋ امالدارى جۇرگىزىلگەن.
"ازاماتشا ن. پوليتسيادا بولدى. ونىڭ قاتىسۋىمەن تەرگەۋ امالدارى جۇرگىزىلگەن سوڭ ول ۇيىنە جىبەرىلدى. تەرگەۋ جالعاسىپ جاتىر" – دەپ حابارلادى پوليتسيا دەپارتامەنتى.
سونىمەن قاتار، ۆەدومستۆو قىلمىستىق-پروتسەسسۋالدىق كودەكستىڭ 201-بابىنا سايكەس ءىستىڭ ءمان-جايى جاريالانبايتىنىن اتاپ ءوتتى.
جۋرناليست باۋىرجان كاريپوۆ Facebook جەلىسىندەگى پاراقشاسىندا:
ء"مولدىر نۇرمان ءوزى تەلەفون تۇتقاسىن كوتەرمەي جاتقانى بەلگىلى بولدى. تەلەفونىن ساراپتاماعا وتكىزگەن. ادۆوكاتى حابارلاستى. ءمان-جايدى ءتۇسىندىردى. قازىر جاريالايمىز. ءمولدىردىڭ ۇستىنەن اكىمشىلىك ارىز تۇسكەن. قاماۋعا الىنعان جوق دەدى", - دەپ جازدى ول.
ەسكە سالساق، بۇعان دەيىن جالپىۇلتتىق سوتسيال-دەموكراتيالىق پارتياسىنىڭ تۇركىستان وبلىستىق فيليالىنىڭ باسشىسى بولعان جۋرناليست ءمولدىر نۇرماننىڭ ۇستالعانى حابارلانعان ەدى. بەلگىلى بولعانداي، ونىڭ ۇيىندە ءتىنتۋ جۇرگىزىلگەن.
جۋرناليست ءمولدىر نۇرماننىڭ جەلىدەگى وقىرماندارى ءتۇرلى پىكىر جازىپ، ونى ىزدەۋدە.
ءجۋرناليستىڭ ۇستىنەن قوزعالعان قىلمىستىق ءىس ونىڭ الەۋمەتتىك جەلىدەگى بەلسەندىلىگىمەن بايلانىستى بولۋى مۇمكىن. ول ءوزىنىڭ Facebook پاراقشاسىندا ەكى كۇن بۇرىن ول تىكەلەي ەفيرگە شىعىپ، ەلدەگى الەۋمەتتىك ماسەلەلەر تۋرالى ءوز پىكىرىن بىلدىرگەن ەدى. ول شىمكەنت قالاسى مەن تۇركىستان وبلىسىندا تاۋەلسىز جۋرناليست رەتىندە تانىمال.
