ءىءىم قازاقستان رەسپۋبليكاسىنىڭ 2022-2026 جىلدارعا ارنالعان سىبايلاس جەمقورلىققا قارسى ساياساتىنىڭ تۇجىرىمداماسىن ىسكە اسىرۋ شەڭبەرىندە پوليتسيا قىزمەتكەرلەرىن ادالدىققا تەكسەرۋ تەتىگىن (Integrity سھەسك) ەنگىزۋ ماسەلەسىن پىسىقتاپ جاتىر. مۇنداي تەكسەرۋلەردىڭ ناتيجەلەرى قىزمەت وتكەرۋ جانە اتتەستاتسيا وتكىزۋ كەزىندە ەسكەرىلەتىن بولادى. بۇل تۋرالى Polisia.kz جاريالادى، دەپ حابارلايدى “ادىرنا” ءتىلشىسى.
اقپارات بويىنشا، ىشكى ىستەر ءمينيسترى مارات احمەتجانوۆتىڭ تاپسىرماسىندا ونىڭ ورىنباسارلارى الماتى جانە استانا قالالارى پاترۋلدىك پوليتسياسىنىڭ جەكە قۇرامىنا نۇسقاۋلىق وتكىزگەن.
“مارات قوجاەۆ پەن يگور لەپەحا ەلىمىزدىڭ ەكى قالاسىندا قوعامدىق ءتارتىپتى جانە حالىقتىڭ قاۋىپسىزدىگىن قورعاۋدى قامتاماسىز ەتەتىن قىزمەتكەرلەردىڭ دايىندىعىن تەكسەردى. ولار قوعامنىڭ سۇرانىستارىنا دەن قويىپ، قيىن جاعدايعا تاپ بولعان ازاماتتارعا ۋاقتىلى كومەك كورسەتۋگە، سونداي-اق سىپايى مىنەز-قۇلىق پەن ەتيكالىق نورمالاردى ساقتاۋعا باعىتتالعان پوليتسيانىڭ سەرۆيستىك مودەلى اياسىنداعى جۇمىستى ەسكە سالدى. سونداي-اق پوليتسەيلەردىڭ زاڭدىلىق پەن ءتارتىپتى ساقتاۋىنا ەرەكشە نازار اۋدارىلدى.
قازىر Integrity سھەسك پيلوتتىق جوباسىن پاترۋلدىك پوليتسيادا سىناقتان وتكىزۋ جوسپارلانىپ وتىر. سەبەبى حالىقپەن كۇن سايىن ءدال وسى قىزمەت وكىلدەرى تىعىز بايلانىستا. ولاردى تەكسەرۋدى ءار ءتۇرلى جاعدايلاردى مودەلدەۋ ارقىلى وزىندىك قاۋىپسىزدىك بولىمشەلەرى جۇرگىزەتىن بولادى”، دەلىنگەن حابارلامادا.
ايتا كەتەيىك، تەكسەرىس جۇرگىزۋدەگى نەگىزگى ماقسات – قۇقىقبۇزۋشىلىقتاردىڭ الدىن الۋ جانە پوليتسيا قىزمەتكەرلەرىندە سىبايلاس جەمقورلىققا قارسى يممۋنيتەت قالىپتاستىرۋ.
