21 اقپان كۇنى جازۋشى دۋلات يسابەكوۆ ومىردەن ءوتتى. ونى شىعارىپ سالۋ ءراسىمى ەرتەڭ وتەدى، دەپ حابارلايدى "ادىرنا" ۇلتتىق پورتالى.
مارقۇممەن قوشتاسۋ جانە جەرلەۋ ءراسىمى 23 اقپان كۇنى وتەدى. بۇل تۋرالى قاسىمحان بەگمانوۆ حابارلادى.
"قازاقستاننىڭ ەڭبەك ەرى، قازاق ادەبيەتىنىڭ كلاسسيگى، جازۋشى-دراماتۋرگ دۋلات يسابەكوۆ اعامىزبەن قوشتاسۋ ءراسىمى قاسيەتتى قارا شاڭىراق - قازاقستان جازۋشىلار وداعىندا، ەرتەڭ، 23 اقپاندا ساعات: 10:00-دە وتەدى.
اسى ساعات: 13:00-دە، قابىلداۋ ۇيىندە (قۇرمانعازى-44) بەرىلەدى.
قازىر ۇلى جازۋشىنى جوعارى دەڭگەيدە شىعارىپ سالۋ ءۇشىن ۇيىمداستىرۋ جۇمىستارى ءجۇرىپ جاتىر.
قر پرەزيدەنتىنە، ەرلان كارينگە، قالاباسىنا، باسقا دا بارلىق ازاماتتارعا العىسىمىزدى ايتامىز. جازۋشىنىڭ وتباسىنا دۇنيە جۇزىنەن كوڭىل ايتۋ تەلەگراممالارى كەلىپ جاتىر", - دەپ جازدى ول.
دۋلات يسابەكوۆ – قازاق پروزاسى مەن دراماتۋرگياسىنىڭ دامۋىنا زور ۇلەس قوسقان قالامگەر. ونىڭ شىعارمالارى قازاق ادەبيەتىندە ەرەكشە ورىن الىپ، بىرنەشە بۋىن وقىرماننىڭ جۇرەگىنە جول تاپتى. «قارعىن»، «گاۋھارتاس» سىندى تۋىندىلارى حالىق اراسىندا كەڭىنەن تانىمال.
