Qazaqstan bilıgı Ūlytau oblysyndaǧy Keŋgır su qoimasynyŋ gidrotehnikalyq qūrylystaryn memleket menşıgıne qaitardy. Būl turaly prokuraturanyŋ baspasöz qyzmetı mälımededı, dep habarlady “Adyrna”.
Aktivtı qaitaru üşın qadaǧalau organy Su resurstary ministrınıŋ atyna ūsynys jasady.
Su qoimasynyŋ iesı — «Qazaqmys Distribiuşn» JŞS-men syiǧa tartu kelısımşarty jasaldy.
«Endı uäkılettı organdar su qoimasy men onyŋ gidrotehnikalyq qūrylymdaryn keşendı tekserudı jürgızıp, odan ärı modernizasiia jasau şaralaryn qabyldauy qajet», — dep atap öttı prokuratura.
1952 jyly salynǧan Keŋgır su qoimasy - Ūlytau oblysyndaǧy eŋ ülkenı. Onyŋ syiymdylyǧy 319 mln tekşe metrdı qūraidy. Būl strategiialyq obektı «Qazaqmys Distribiuşn» JŞS-nıŋ balansynda boldy. Su qoimasyn memleketke qaitaru qajettılıgı bırneşe jyl boiy köterılgen bolatyn. Mysaly, deputat Rysqali Äbdıkerūly 1996 jylǧy ükımet qaulysymen sılteme jasap, onyŋ oryndaluy türlı sebeptermen sozylyp kelgenın atap öttı.
«Qazaqmys Distribiuşn» JŞS «Qazaqmys» tobynyŋ qūramyna kıredı. egov.kz mälımetterı boiynşa, toptyŋ iesı - Kazakhmys Copper. Onyŋ 100% aksiiasy niderlandtyq KCC B.V. holdingınıŋ qolynda. KASE-de jariialanǧan esepterge säikes, KCC B.V. holdingınıŋ soŋǧy baqylauşysy Vladimir Kim (70%), al 30% ülesı korporasiianyŋ būrynǧy basşysy Eduard Ogaiuǧa tiesılı. Ekı käsıpker de Forbes.kz reitingınde Qazaqstannyŋ eŋ bai 20 adamynyŋ qatarynda.
